Мегьарамдхуьруьн районда агакьнавай емишрин бегьер кIватIунин кIвалах худда кьиле физва. Муниципалитетдин информациядин къуллугъди хабар гузвайвал, алай вахтунда райондин майишатра цил авай емишрин бегьер вахчузва. ПIинийрин, 80 тонндилай артух алучайрин ва машмашрин бегьер кIватIна куьтягьнава. Гила хутар кIватIунив эгечIнава — им Россиядин базарра игьтияж авайбурук акатзавай цил авай культурайрикай сад я.
Районда авай багъларин умуми майдан 6253 гектардиз барабар я. Цил авай емишар районда 1200 гектарда цанва, абурукай хутари 600 гектар кьунва. Къенин йикъалди муниципалитетдин лежберри 300 тонн хутар кIватIнава. И кIвалах, хабар гузвайвал, гьеле давам жезва.
Райондин кьил Фарид Агьмедова къейдзавайвал, хуьруьн майишат муниципалитетдин экономикадин кIвенкIвечи хилерикай сад я. Асул чка ина багъманчивили кьазва, эхиримжи вахтара иник куьлуь емишрин хелни, кьилди къачуртIа, еке игьтияж авай некьияр гьасилунни акатнава.
“Чи виридалайни еке девлет чилел зегьмет чIугвазвай инсанар я. Къуй абурукай гьар садан зегьмет берекатлуди, хийир гъидайди хьурай”, — къейдзава ада.
Ф.Агьмедова гьисабзавайвал, хуьруьн майишатдинди тир чи республикада и хел виликди тухун патал вири мумкинвилер тешкилзава, кьилинди лагьайтIа, ина хуьруьн майишатдин хел гележегдани нетижалудаказ виликди тухун патал кутугай, берекатлу чил ва субтропикрин хъуьтIуьл гьавадин шартIар ава. “Хуьруьн майишатдин хел нетижалудаказ виликди тухун чи кьилин месэлайрик акатзава”, — гъавурда твазва райондин кьили.
«Лезги газет»
