Дагъустандин мектебар ЕГЭ-дай 100 балл къазанмишуналди акьалтIарай жегьилриз 100 агъзур манатдин кьадарда аваз премия гуда. Гьа икьван кьадарда аваз премия мектебра кIелзавай аялрин арада тухузвай Вирироссиядин олимпиададин эхиримжи паюна гъалиб хьайи аялризни гуда.
Идакай и йикъара бажарагълу аялрихъ галаз онлайн-къайдада кьиле фейи гуьруьшдал Дагъустандин Кьилин везифаяр тамамарзавай Сергей Меликова хабар гана.
ЕГЭ-рай 100 балл къазанмишнавай 40-далай виниз выпускникар, гьакIни федеральный чIехи проектра гъалиб хьайи аялар Махачкъалада, Дербентда, Къизлярда ва Гуниб районда тешкилнавай махсус майданрал кIватI хьанвай.
Гуьруьшдин сифте кьиляй Сергей Меликова жегьилриз къазанмишнавай виниз тир агалкьунар мубаракна. Ада къейд авурвал, республикадин мектебра кIелзавай аялриз, чпин бажарагъ ачухардай ва мадни виликди тухудай мумкинвал гун патал, жезмай кьван къулай шартIар тешкилна кIанда.
“Чахъ алава образованидин объектар гьатта лугьуз тежер кьадар тIимил ава. Куьн, мектебрин имтигьанрин къалабулухвал кьулухъ тунвай чIехи инсанар гъавурда гьатзавайвал, тек са школадин бинедаллаз виниз тир агалкьунрив агакьарун мумкин туш. И кар патал алава образование лазим я. Ада, зи фикирдалди, гележегдин рехъ, квез итиж авай пеше хкягъиз куьмек гузва. Умудлу я, куьне чаз инлай кьулухъ гьихьтин рехъ кьуна фидатIа меслятда”, — лагьана республикадин Кьили жегьилрихъ элкъвена.
Дагъустанда образованидин “Сириус-Альтаир” центр, аялрин “Кванториум” технопарк ава, Илимрин гъвечIи академиядин бинедаллаз рекъемрин рекьяй виликди финин “IT-Куб” кардик ква, Вирироссиядин “Рекъемрин мектеб” проектдин сергьятра аваз лагьайтIа алай аямдин рекъемрин образованидин алем тешкилда. Республикадин Кьилиз вичиз образованидин хилен стратегия алава, гьа жергедай яз военный ва ватанпересвилин образованидин объектрин кьадар ва ерилувал артухаруникай ибарат яз аквазва.
“Мукьвал тир вахтунда чна Вирироссиядин “Юнармия” гьерекатди кьунвай чка мягькемарун патал теклифар гуьзлемишзава, зи фикирдалди, къведай йисуз Махачкъалада юнармиядин КIвал эцигиз башламишда. Ана неинки юнармейвийри, гьакIни IT-технологийриз, уьлкведин ва республикадин тарихдиз итиж ийизвай вирибуру чирвилер къачуда. ГьакIни чна гьулуьн кьере военный ва ватанпересвилин “Авангард” центр тешкилунин жигьетдай къарар кьабулзава”, — хабар гана С.Меликова.
Ада къейд авурвал, Дагъустанди виниз тир пешекарвал авай кадрийриз еке итиж ийизва ва и жигьетдай бажарагълу жегьилрик еке умудар кутунва. Гьелбетда, и месэла лайихлу мажибрихъ ва кутугай шартIар тешкилунихъ галаз алакъалу я. Республикадин Кьили умуд кутазвайвал, алай вахтунда мектебар акьалтIарзавай аялри вузар куьтягьдай вахт алукьдалди Дагъустанди ачухзавай кадрийриз лайихлу къимет гуда: кьабулиз жедай мажибдалди ва неинки кIвалахиз, гьакIни вири патарихъай виликди фидай мумкинвал гудай шартIаралди.
Гуьгъуьнлай Сергей Алимовича жегьилриз, абуруни — республикадин Кьилиз рикIик квай жуьреба-жуьре суалар ва теклифар гана, фикирар раижна. ИкI, ихтилат Дагъустанда датIана кардик жедай “Еке перемена” тешкилат арадал гъуникай, РД-дин образованидин ва илимдин министерствода жегьилрин Советар тешкилуникай фена. Ада Дагъустандин жегьилриз гъалатIриз рехъ гуникай кичIе тахьуниз, гьамиша виликди физ алахъуниз эвер гана.
“Алай вахтунда жегьилрин вилик икьван чIавалди садрани тахьай хьтин рекьер ачух я. Чна умуд кутунвайвал, инлай кьулухъни, образованидин жуьреба-жуьре конкурсра, олимпиадайра чна хайи республикадин тIвар лайихлудаказ раижда. Заз квез куь алакьунар, бажарагъ ва активлувал Дагъустан еримлу авунин, ватанэгьлийрин четин месэлаяр гьялунин рекье ачухаруниз эвер гуз кIанзава. Жегьилриз цIийи крар гъиле кьаз кичIе жедач. Къуй исятда тестикьарнавай махсус премийри куьн вилик эцигнавай макьсаддив агакьариз куьмек гурай. Квез югъур хьуй!”, — лагьана РД-дин Кьили.
Ада эхирдай къейд авурвал, жегьилрихъ галаз ихьтин гуьруьшар тухун хъсан адетдиз элкъуьрда.
Жасмина Саидова
