1-июлдиз Белиж поселокдиз РД-дин Кьилин везифаяр вахтуналди тамамарзавай Сергей Меликован тапшуругъдалди Дагъустан Республикадин Халкьдин Собранидин депутат Ферзиллагь Исламов атана. Ада 100 йис тамам хьанвай Ватандин ЧIехи дяведин иштиракчи Межидов Аллагьверди Аллагькъулиевичаз юбилей мубаракна ва адав Россиядин Федерациядин Президент Владимир Путинан тебрик вахкана.
Президентдин тебрикда лугьузва: “РикIин сидкьидай Квез за юбилей мубаракзава. Куь несилдин кьилел Ватандин ЧIехи дяведин еке мусибатдин имтигьанар атана. Дяведилай гуьгъуьнин йисарани Куьне еке зегьметар чIугуна. Амма Куьне ва Куь юлдашри вири четинвилериз дурум гана, душмандал гъалибвал къазанмишна ва чукIурнавай уьлкведал чан хкана. Куь зегьметдин, уьмуьрдин рехъ, тежриба, Ватандиз авай кIанивал, вафалувал гьамиша акьалтзавай несилар ва чун патални хъсан чешне жеда. Заз Квехъ мягькем сагъламвал ва руьгьдин гумрагьвал хьана кIанзава”.
Ф.Исламова Аллагьверди Межидова гъалибвилик кутур кьетIен пай къейдна ва лагьана: “Куьн чаз халис чешне я. Куьне чаз лайихлувилелди яшамиш, Ватандал рикI жез чирзава”.
Межидов Аллагьверди 1921-йисан 1- июлдиз Кьурагь райондин Штулрин хуьре дидедиз хьана. Дяведин четин йисара ада колхозда жавабдар къуллугъар кьилиз акъудна. Лап хъсан пешекар яз хуьзвайтIани, 1944-йисуз ам гуьгьуьллувилелди фронтдиз фена. Хейлин женгера иштиракай кьегьалдал залан хер хьана. 1945-йисан зулухъ ам Дальний Востокдиз рекье туна ва Япониядин милитаристрихъ галаз женг чIугуна. Дяведин набут гьукуматдин са шумуд шабагьдин иеси я. Ада 8 веледдиз тербия гана.
Къагьриман Ибрагьимов