Заз чиз, са заз ваъ, масадбурузни, жуванбурукай пис рахайла, абуру чIуру крар авурла, такIан жеда. Иллаки телевиденидай маса регионриз фенвай чи жегьилри “кукIунрик кьил кутуна, тарашна, гатана, автомашин чуьнуьхна”, — лугьудай хабаррихъ яб акалайла.
Зи уьмуьрдин чIехи пай патарал акъатайди я. Хайи хуьре юкьван школа авачиз, за АрхитIа, Рухуна, Кьасумхуьрел кIелна, Махачкъалада пединститут куьтягьна.
Хив райондин школайра кьуд йисуз аялриз тарсар гана. Къазахстандин ЦIийи Узень шегьердин профтехучилищеда, ахпа МВД-дин органра кIвалахна, 1990-йисуз, Советрин Союз чукIурайла, Пермский крайдиз акъатна. Заз уьмуьрда вакъиаяр, затIар, инсанар гзаф акуна, жуьреба-жуьре дуьшуьшарни кьилел атана. Амма садрани за инсансузвилин гьерекатриз рехъ ганач. Жувакай масад бейкефарнач. Жув хьайи чкайрин къанунрал, адетрал амална, ацукьун-къарагъун вилив хвена, кIвалахдин юлдашрихъ, къуншийрихъ, рекье-хуьле гьалтзавай ксарихъ галазни хушдаказ рафтарвална. Инсанвилин алакъайриз гьуьрметна. Ида зазни чара инсанрин арада гьуьрмет, авторитет къазанмишдай мумкинвал яратмишна.
Жуван гъилик кIвалахай вири дагъустанвийризни за гьа и жуьреда яшамиш хьун, зегьмет чIугун теклифзавай, кIанарзавай. Амма дуьз меслятар, акьулар кьан тийизвайбурни гьалтна. Гьа идалди абуру чпин уьмуьрдизни зиян гана. Гьа са вахтунда абуру чпин чIуру амалралди халкьдин тIварцIелни хъен вегьезва. Ахьтин краривай жезмай кьван яргъа хьана кIанда.
Зун ЦIийи Уьзенда колониядин начальникдин заместитель тир. 1986-йисуз шегьерда авай пожарный отделда штатар тIимиларун кьиле фена. Аник пуд лезгини акатна. За абур чи колониядиз кIвалахал хкана, офицервилин къуллугъдал 1989-йисуз чи колонияда авай са украинвиди залай фитнедин арза авуна. Адаз кIвалахиз кIандачир.
За, гьар юкъуз тапшуругъар гуз, ам кIвалахдал желбдай. Гьавиляй адаз зун такIан тир. Гьадан таъсирдик акатна за куьмек гайи кьве лезги гадани. Арза ахтармишиз управленидай комиссия атайла, собранидал жуванбурукай сад заз акси экъечIна. Коллектив санлай (урусар, къазахар, чеченар ва масабур) закай хъсан рахана, абуру зи тереф хвена. Арзада кхьенвай гафарни тестикь хьанач. Комиссия хъфена. Амма жува куьмек гайи кас жуваз акси экъечIайла зи рикI тIар хьана.
Пермский крайда кIвалахзавай вахтара (1990-2004-йисара) зун гьар йисуз отпускдиз хуьруьз хкведай. Дар йисар тир. Зи патав кесиб инсанар къведай, чпин рухвайриз зун авай чкада кIвалах жагъурун тIалабиз. Са чи хуьряй за 16 кас кIвалахал эцигна. Амма са бязибуру чеб хъсандиз тухванач.
Садан алчахвилин крарикай вине авай идарайриз кхьидайбурни хьана. А вахт масад тир. Арзаяр ахтармишдайбурни гъиле-гъил аваз къведай. Вучда, чибуру лугьузвайвал, цуькIуьн жуван ченедал ахватзавай. Къуллугъдилай алудзавай чкадал за ам хвена. Жуван инсанрай акур аламатар рикIел хкиз, заз лугьуз кIанзава хьи, чи гзаф жегьилар, ватанда кьил хуьдай мумкинвал авачиз, Урусатдиз физва. КIвалахал акъваззава. Са тIимил вахт фейила, жибинда пулни хьайила, са бязибурун рикIелай чеб гьина аватIа алатзава, законсузвилериз рехъ гузва. Чуьнуьхунарзава, язава, къакъудзава, кикIизва… И кIвалахрин эхир дустагъдиз фин я. Ихьтин инсанри виляй вегьезва чебни, чпиз куьмекар гайибурни, Кавказдин халкьарни. Жув са шумудра шагьид хьайи крар я, чкадин инсанри куьмекарни гуда, меслятни къалурда. Амма чIуру кIвалах ийиз хьайитIа, абуру эхдач, лугьуда. Эгер вуна вун дуьз тухуз хьайитIа, абуру вун чпикай кьада, вун маса миллет тирди рикIелай алудда, ваз гьуьрмет ийида. Эгер вахъ галаз маса ксар къалмакъал хьайитIа, гьахъвал ви пата авайла, абуру ви пад кьада. Заз урус халкьдин векилри гзаф куьмекар гайиди я, закай еке объединенидин начальник, райсоветдин депутат хьана. Зун пенсияда, хайи маканда аватIани, таниш урусри заз суварар, хайи йикъар телефондай мубарак ийизва, бязи вахтара гьакI зенгерни ийида, хабарар кьада. Зун гзаф шад я и кардал. Им за къазанмишнавай девлет я.
Дагъустан Россиядин Федерациядик акатзавай республика я. Агьалийриз, кIани региондиз фена, кIвалахдай, кIелдай, яшамиш жедай ихтияр ава. Гьар са касди фейи чкада вич лайихлувилелди тухунни лазим я. Жувакай садни инжиклу тавуна, инсанвал вине кьуна, Дагъларин уьлкве тIвар алай макандикай анжах хъсан фикир арадал гъидайвал.
Масуб Магьмудов,
отставкада авай полковник, педагог