Алатай гьафтеда Махачкъалада, Дагъустандин художникрин Союздин выставкайрин залда, Карачаево-Черкесиядин лайихлу художник, “Дизайнеррин Союз” международный Ассоциациядин векил ва Карачаево-Черкесиядин художникрин Союздин председателвиле яргъал йисара зегьмет чIугур Мегьамедзериф Гьажиеван выставка ачухна.
Ам ачухуниз талукьарнавай шад мярекатда Дагъустандин художникрин Союздин выставкайрин залдин директор Амирхан Мегьамедова, художник-график Аладдин Гьарунова, общественный деятелри, гьакIни художникдин хизанри ва дустари иштиракна.
Къейд. М.Гьажиев 1952-йисуз Ахцегьа дидедиз хьана. 1979-йисуз ДГПУ-дин художественно-графический факультет акьалтIарай жегьилди художественный школада кIвалахиз башламишна. 9 йисалай ам Карачаево-Черкесиядиз куьч хьана, ана тарсар гун давамарна. Къейд тавуна жедач, Мегьамедзериф Гьажиеван ученикрикай гзафбур жуьреба-жуьре конкурсрин гъалибчияр я. Алакьунар ва агалкьунар фикирда кьуналди, адаз Дагъустандиз хтун теклифна.
М.Гьажиеван эхиримжи кIвалахрикай сад хайи крайдиз бахшнава. Ада ана хайи ерийрин декоративно-прикладной искусстводиз талукь милли вири лишанар устадвилелди санал кIватIнава.
Выставка ачухуниз талукьарнавай шад мярекатдин эхирдай Мегьамедзериф Гьажиева малумарайвал, азадвал авачирдакай художник хьун мумкин туш. “Гьавиляй гьамиша азадбур ва ачухбур яз амукьиз чалишмиш хьана кIанда”, — къейдна ада.
РикIел хкин: виниз тир дережадин искусстводал рикI алай ксариз тамам са вацра выставкадиз тамашдай, гьакIни Мегьамедзериф Гьажиеван кIвалахрин гуьрчегвилиз къимет гудай хъсан мумкинвал ава.
Бела Ашурбегова