Президентдин чар кIелайла
Америкадин президент Р.Рейгана “Советрин Союз хъилен империя я” гафар герен-герен тикрардай. Горбачевазни Ельциназ ва абурун гзаф гъилибанриз, хаинриз а гафарикай хуш къвезвай — чукIурна туна гзаф халкьарин умуми кIвал — сад тир къудратлу держава. Советрин Союз вири дуьньяда ислягьвилин даях тир, ада садални вегьенач, гена вири дуьнья фашизмдин тIегъуьндикай хвена.
“Хъилен империя” гьакъикъатда гьим ятIа, США-ди тухузвай ягьсуз, гьаясуз, акьалтIай къизмиш, угъраш политикади ачухдаказ къалурзава: чи уьлкве элкъвена НАТО-дин базайрин юкьва тун, гьиниз хьайитIани, вичин кьацIай, ивидай рчанвай тIиш сухун, аслу тушир политика тухузвай гагь са, гагь маса уьлкведа дявейрик кьил кутун, къенепатан крарик къаришмиш хьун, “демократия” лугьудайди илитIун, “рангунин революцияр”, террористрин кIеретIар тешкилун, террористрин тешкилатрин терефдал хьун ва абур яракьламишун, Россия, Иран хьтин зурба государствойрал “санкцияр” илитIун — ихьтин эдебсуз крарин сиягь мадни кIамай кьван давамариз жеда.
И йикъара “Россия-24” каналдай гайи са передачадиз куьн килигнатIа, тапарар, гьар жуьредин къундармаяр, Россия такIанариз алахъун США-ди государстводин дережадин политикадиз элкъуьрнава. ИкI, къейдзавай хьи, са жуьрединни лув гудай тарелкаяр (НЛО) авайди туш, абурун проектрал Америкадин махсус са центр фадлай машгъул я. А центрадин кьилени са миллиардер ава. Лув гудай тарелкаяр США-ди разведкадин метлебар патал ишлемишзава.
“Аль-Каида”, Бен Ладенни Америкади майдандиз акъуднавайди я лугьузва, вичиз герек хьайи чкайра ишлемишун патал. Обамадин девирда Бен Ладен тергна лугьунни къундарма я. Ам, чинин кIалубар дегишарна, къени сагъзама лугьузва.
Россиядик квачир тахсирар, гунагьар кутунин, политика Пентагондин итижар патал я: футфа тваз, са къатда военный рекьериз ийизвай харжийрин кьадар артухарзава. ЦIи и рекъем 735 миллиард доллардиз барабар я. Россиядинни Китайдин оборонадин харжияр санал къачуртIани, гьадалайни са шумуд сеферда — гзаф.
Ихьтин шартIара, анжах къуватдиз икрамзавай дуьньяда, В.В.Путина вичин Чарче къейднавайвал, “эхиримжи йисара армия ва флот мягькемарунин жигьетдай еке кIвалах тухун” лап чарасуз кар хьанва. ИкI, чи армия ва флот алай аямдин яракьралди таъминарун 3,7 сеферда артухариз алакьнава. Кьушунрив военный техникадин 300-далайни гзаф цIийи жуьреяр агакьнава. Чи армиядин къудратлувилин бине, гьелбетда, стратегиядин метлебдин ядерный къуватри тешкилзава. Авайбурал ихьтин цIийи 80 ракет алава хъхьанва. Цин кIаникай фидай луьтквейрал мад 102 ракет эхцигнава. Абуруз цин кIаникай фидай, стратегиядин метлеб авай, ракетар алай “Борей” крейсеррини къуват хгузва.
Ракетрин 12 полк машгьур “Ярс” комплексдалди яракьламиш хъувунва. Уьлкведин оборонадин бажарагълувал мягькемарунихъ рекье тунвай маса крар, серенжемарни тIимил авач. Россиядин сергьятар тирвал ракетралди гьужумуникай виликамаз хабар гудай радиолокационный майдан (поле) туькIуьрунихъни зурба метлеб ава. Президентди лагьайвал, СССР чкIайдалай кьулухъ ана еке хъалхъамар арадал атанвай.
Армия, оборона къудратлу хьайила, кьилелай зарпанд алатнавай ягьсузрихъ галазни уьтквемдаказ рахаз, абур чкадал ацукьариз жеда. Абуру вил къяда.
Чи халкьди армиядиз гьамиша куьмек гуз хьайиди я. Ам мягькемарун, яракьламишун патал такьатрин гьайиф садрани атанач. Эхь, барут гьамиша кьурудаказ хвена кIанда, гьавайда лугьузвайди туш.
Яракьлу къуватар мягькемаруналди чи уьлкведи садазни къурху гузвач. Дуьньядин гьалари, США-ди иллаки эхиримжи йисара тухузвай чIуру сиясатди мажбурзава чун мукъаят, уях, мягькем хьуниз. СССР, Варшавадин икьрар, соцлагер чукIурна, ГДР-дай, Афгъанистандай чибур “кат хъувуна”. Нетижада империалист ампайриз, НАТО-диз чи уьлкве, гьам адан армия, гьам экономика лап зайиф хьанвайди акуна. “Къайи дяведа” чеб гъалиб хьанвайди малумарна, гьавиляй СССР-дин гуьгъуьналлаз Россияни пайи-паярдай планар майданда туна. “Сибирь хьтин чIехи уьлкве са государстводинди хьана кIандач”, лагьанай са шумудра США-дин госсекретарь М.Олбрайта ва масабуру, анин гзаф кьадар девлетра, ресурсра вил туна.
Зайифди гьамиша вирида гатада. Гьавиляй чаз садрани зайиф жедай ихтияр авач. Армия къудратлу хьуни чи руьгь хкажзава, гележегдихъ инанмишвал, экономикада ва маса хилерани хъсан патахъ дегишвилер хьунихъ умудар артухарзава. Гужлу экономика авачиз армия къудратлуди яз хуьн гзаф четин акъваззавайди я.
Шихмурад Шихмурадов
