6-мартдиз Дагъустан Республикадин Гьукуматдин Председатель Артем Здунов РД-дин печатдин ва информациядин министерстводин коллективдихъ галаз гуьруьшмиш хьана ва ведомстводин кар алай терефар къалурна, республикадин СМИ-яр вилик тухунин жигьетдай государстводин политика уьмуьрдиз куьчуьрмишунин гележегдин крар тайинарна.
РД-дин печатдин ва информациядин министрдин везифаяр вахтуналди тамамарзавай Рашид Акавова лагьайвал, министерстводин кар алай везифайрикай сад государстводин властдин органри тухузвай кIвалахдикай агьалияр вахтунда ва тамамдаказ хабардар авун я. Идалай гъейри, ведомстводи, гьа гьисабдай яз СМИ-рини, обществодин ва халкьдин майишатдин вири хилера кIвалахзава, гьа са вахтунда терроризмдин ва экстремизмдин идеологиядиз аксивалзавай махсус программани кардик ква.
Министрди къейд авурвал, республикадин информациядин хилен лап важиблу паярик милли чIаларал акъатзавай газетар акатзава, гьикI лагьайтIа, абуру милли культура, адетар хуьнин ва вилик тухунин карда еке роль къугъвазва. Ада мадни лагьайвал, печатдин вири изданийри электронный къурулушдани ва гьакI сетрин сегментдани кIвалахзава. Санлай къачурла, къенин йикъалди республикадин агьалийрин 90 процентди сетрин информациядикай менфят къачузва. Государстводин печатдин изданийрикай — анжах 38 процентди.
И месэладиз талукь яз А.Здунова министерстводин руководителрин фикир чпин кардал гзаф кьадардин муьштерийрин фикир желбзавай хсуси СМИ-ра государстводин политика гегьеншардай рекьер ишлемишунал желбна ва гьа са вахтунда информациядин майданар гегьеншарунин карда государстводин СМИ-рин кIвалахдин менфятлувал хкажна кIанзавайдакай лагьана.
Гуьруьшдал гьакI республикадин информациядинни культурадин центрадин кIвалахдихъ галаз алакъалу месэлайризни килигна. РД-дин Гьукуматдин Председателдиз министерстводин интернет-проектар къалурна.
— “Куьн кIвенкIве авай десте я, гьикI хьи, информациядин месэлайрал машгъул жезва, абур къенин юкъуз виридалайни къиметлу ва багьа ресурс я. Массовый информациядин ва коммуникацийрин хиле тухузвай государстводин политикадин гьакъиндай анжах куь министерстводи жаваб гун лазим я. Им кьилин везифани я. Гзаф кьадар агьалийриз таъсирзавай СМИ-рин вири жуьрейрин изданийрихъ галаз куьне кIвалахун лазим я. Чна сетрин информациядикай менфят къачузвай ва абурухъ ихтибарзавай 90 процент агьалийрихъ галаз гьи жуьреда кIвалахдатIа, гьадакай фикир авун ва тайин серенжемарни кьабулун герек я. Инсанри социальный сетриз ихтибарзава. ИкI ятIани, государстводин СМИ-рин къуллугъчийри гьа и жуьредин кIвалахдиз лап тIимил фикир гузва”, — къейдна Премьер-министрди.
Чи мухбир