6-мартдиз Россиядин Федерациядин здравоохраненидин министр Вероника Скворцова Дагъустан Республикада кIвалахдин рекьяй мугьманвилиз атана.

Дагъустандин Кьилин везифаяр вахтуналди тамамарзавай Владимир Васильев ва Вероника Скворцова медицинадин алай аямдин идарайрикай сад тир Республикадин перинатальный “Диде Патимат” центрада хьана. Ина абур РД-дин здравоохраненидин министрдин везифаяр вахтуналди тамамарзавай Танка Ибрагьимов ва медицинадин идарадин регьбер Низам Ос­мановни галаз перинатальный центрадин кIвалахдихъ галаз таниш хьа­на ва медицинадин рекьяй къул­лугъ­чийрихъни пациентрихъ галаз рахана.

2017-йисуз перинатальный центр ачухуни дидедиз ва аялдиз медицинадин рекьяй мадни ерилу куьмек гудай мумкинвал таъминарна. Йисал къведалди яшда авай аялар хуьнал гьалтайла, шаз Дагъустан хъсанбурун жергеда авай. 2015-йисав гекъигайла, 2017-йисуз таза аялар кьиниз талукь рекъемар 20% тIимилариз алакьна. Аял хазвай дидеяр кьинин дуьшуьшар кьве сеферда тIимил хьанва.

Перинатальный центр аялар хазвай дидеяр патал чи региондин чIехи метлеб авай идара я. Ина акушерстводин, гинекологиядин, неонатологиядин ва таза аялар операция авунин хилерайни виниз тир дережадин, вири технологийрикай менфят къачуналди медицинадин куьмек агакьарзава.

“Диде Патимат” перинатальный центр Кеферпатан Кавказда виридалайни зурба центрайрикай сад я, ина 150 кас патал чкаяр ава. Йиса лагьай­тIа, 8 агъзурдалай виниз дишегьлияр кьабулиз жезва.

“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, мугьманар Дагъустандин медицинадин маса идарайризни фена. ИкI, республикадин аял­рин ва чIехибурун клинический азарханайра диагностикадин ва сагъа­рунин рекьяй виниз тир технологийрин къайдайрикай менфят къачунин асул метлеб аваз  вилик фини фикир желбзава.

“Куникди хьайи хирерин (ожоговый) лап вижевай центр, са кIусни тариф тавуна, завай лугьуз жеда хьи, ада гьам чIехибур ва гьамни аялар патал кIвалах­зава. Ам, куникди хьайи хирер сагъарунал гьалтайла, уьлкведин виридалайни хъсан 5 центрадик акатзава. Гьам Кьиблепатан ва гьамни Кеферпатан Кавказдин федеральный округра кьилин центр яз, адавай вичин  хивез везифаяр къачуз жезва. Идалайни гъейри, и центрада кIвалахзавай вини дережадин пешекаррихъ чпи арадал гъанвай (авторвилин) къайдаяр ава, гьа гьисабдай яз бедендин 60-70 % кайила, арадал къвезвай лап агъур гьалар сагъаруниз талукь язни. Ина, дугъриданни, вилик жергейрин технологияр кардик ква”, — къейдна Веро­ника Скворцовади. Ада мадни вичиз амай подразделенийриз-травматологиядин, ортопедиядин хилериз талукь тир, дамаррин Региональный центрадиз-фидай мумкинвални хьайиди лагьана. Здравоохраненидин министерстводин кьил дявейрин ветеранрин госпиталдикай кьилди рахана. “И госпиталди заз  лап хъсан таъсирна. Сифте нубатда, ина кIвалахза­вай духтурри-илимрин кандидатри, чпихъ хъсан гележег авай, азарлуйрив рикIин сидкьидай эгечIзавай жегьил пешекарри”, — къейдна ада.

Чи мухбир