(Эхир. Эвел — 2020-йисан 44-52, 2021-йисан 1-9, 11-14, 18-25-нумрайра)
Утбагь ибн Гъазван асгьабдин (Аллагь рази хьурай вичелай) гафар (вязер)
Утбагь ибн Гъазван асгьабди (Аллагь рази хьурай вичелай), вич аль-Басрат шегьердин эмир тирла, хутIбадал лагьана: “…Адалай гуьгъуьниз! Дугъриданни, и дуьнья куьтягь хьуниз мукьвал хьанва, ам вичин эхирдихъ хъфенва, адакай амайди анжах “кIанер” я — къапуна амай кIанер хьиз, чебни (къапунин) сагьибди экъичзавай! Куьн и дуьньядай вич гьич куьтягь тежедай чкадиз экъечIда (гьамишалугъ амукьдай Эхиратдиз). Инай куьн квев гвай виридалайни хийирлу шейэр гваз (иман ва диндар амал) экъечIдайвал ая!
Чаз хабар ганва (гьадисда): Жегьеннемдин къерехдал акъвазна, аниз гадарай къван агъуз пудкъанни цIуд йисан къене аватда… ЯтIани ам кIанив агакьдач (гьакьван чIехи я ам!) Кьин кьазва Аллагьдал, ам (жегьеннемэгьлийрай) ацIуда! Куьн а кардал ажеб яни?!
Мад са (гьадисда) хабар ганва: Женнетдин ракIаррин кьве хилен гьяркьуьвал яхцIур йисан къене фидай мензил кьван я ва и гьяркьуь ракIаррин араяр михьиз ацIудай (женнетэгьлийрин жемятралди) Югъ къведа! Дугъриданни, зун Пайгъамбардихъ (къуй Аллагьдин патай салават ва саламар хьурай вичиз) галаз (сифте дин кьабулайбурукай) ирид лагьай кас хьанай. Чаз (дарвиле аваз), тарарин пешерилай гъейри, недай мад са тIуьнни авачир. Чи сиверин къвалариз хирер акъатна…
Садра заз (иски) аба (халат) жагъана. Ам за кьве чкадал пайна: заз ва Сагьд ибн Маликаз. Жуван паюникай за “юкьвалай агъадихъ кIевдайди” авуна алукIна, Сагьдани гьахьтинди авуна алукIна…
Къе чакай гьар садакай жуьреба-жуьре шегьерра (уьлквейра) эмирар хьанва. Дугъриданни, за Аллагьдивай зун хуьнин куьмек тIалабзава: жуван нефсина (чанда) чIехиди (зурбади) хьуникай, амма Аллагьдин вилик зун гъвечIиди (усалди) хьуникай!” (ат-Таргъиб).
Ямин Мегьамедов,
диндин рекьяй алим
