Илимдин рекье еке агалкьунар къазанмишнавай лезгийрикай сад МГИМО-дин (РФ-дин МИД-дин Москвадин гьукуматдин международный алакъайрин институт. Дуьньяда машгьурбурукай тир и вузда алай вахтунда 18 хиляй пешекарар гьазурзава)  регионар идара авунин ва милли сиясатдин кафедрадин до­цент  Эльвира  Маиловна Аминова  я.

Сифтедай ада Дагъустандин политехнический институтда инженер-технологвилин, гуьгъуьнлай МГИМО-да гьукуматдин ва муниципальный крар идара авунин пешейрай чирвилер къачуна.

Эльвира Маиловнади 1985-йисуз технический илимрин кандидатвилин (диссертациядин тема — “Интенсификация и исследование процесса пеносушки пастообразных продуктов при комбинированном энергоподводе”), 2006-йисуз юридический илимрин кандидатвилин (диссертациядин тема — “Совершенствование правового регулирования аудиторской деятельности в банковской сфере Российской Федерации”) дережаяр къачуна.

Алатай йисара ада уьлкведин кьилин вузра пешекарвилин дережа хкажна. Алимди вузда гьукуматдин ва муниципальный хилера бюд­жетрин крариз, финансризни налогриз, регионрин ва муниципальный дережайра яшайишдин сиясатдин крар кьилиз акъуддай алай аямдин алатриз, регионда яша­йишдин сиясат идара авуниз талукь дисциплинайрай тарсар гузва­.

Ада Россиядин, вири халкьарин жуьреба-жуьре конференцийра иштиракзава, ингилис чIални чиз­ва. Ба­жарагълу алимдин къелемдикай цIуд­­ралди илимдин макъалаяр, мо­нографияр, ктабрин кьилдин паяр хкатнава. Вузрин студентар патал Москвада чапдай акъуднавай “Технология консервов и пищеконцентратов”, “Машины и аппараты пищевых производств” учебникрин пуд ав­тордикай сад Эльвира Аминова я.

Жегьил алимди зегьметдин рехъ 1979-йисуз ДГТУ-дин илимдин къуллугъчивилелай башламишна. Гуьгъуьнлай та 1994-йисалди  ина ада чIехи преподаватель, доцент, технологийринни машинрин кафедрадин профессор, 2002-йисалди Россиядин Да­гъустанда авай Сбер­банкда валютайрихъ галаз алакъалу хилен начальникдин заместителвиле кIвалахна. 2002-йисалай инихъ винидихъ тIвар кьунвай МГИМО-дин кафедрада доцентвалзава.

Ада Москва шегьердин образованидин департаментдин “Реализация механизмов развития и эффективного использования потенциалов вузов в интересах г. Москвы” проектдани иштиракна. Лезги алимдин агалкьунар лайихлу тIва­раралди, гьуьрметдин грамотайралди ва хейлин маса шабагьралди къейднава.

Къуй адахъ мадни чIехи агалкьунар хьурай!

«Лезги газет»