Цекверикай итижлу делилар
Дуьньяда чпин вири уьмуьр цеквер ахтармишуниз серфай алимар малум я. И гьашаратрикай гзаф халкьари мисалар, риваятар туькIуьрнава. Тажуб жедай кар туш, абур чпин кьетIенвилералди, ажайиб жуьреда уьмуьр кьиле тухуналди лишанлу я. Ингье са бязи итижлу делилар.
— Чилел цекверин тахминан 14 агъзур жуьре яшамиш жезва. Пешекарри гьар йисуз цIийи-цIийи жуьреярни дуьздал акъудзава.
— Цеквер лап къадим девиррин гьашаратар я.
— Цекверин хизанра чпин арада «пешеяр» пайзавай дуьшуьшарни жезва: недай затIар дашмишдайбур, къаравулар, шарагрихъ гелкъведайбур…
— Гуьлле-цеквре кIасуникди хьайи тIал гуьлледин хирен тIалдиз ухшар я. И жуьредин цеквре кIасай чкадин тIал суткадин къене давам жеда.
— Тропикра яшамиш жезвай бульдог-цекврен кIасун инсан патал хаталу я, гьатта кьиникьал гъун мумкин я.
— Алимри тестикьарнавайвал, цекверивай чпин заланвилелай 50 сеферда артух пар ялиз жезва.
— Цекверин хизан (кIеретI) цIудакайни, гьатта са шумуд миллиондикайни ибарат хьун мумкин я.
— И гьашаратрин гьар са хизандихъ вичин тикрар тежер ни жеда, гьа ниэдин куьмекдалди абуру «жуванбурни чарабур» тайинарзава.
— Виридалайни гъвечIи цекврен яргъивилел 1 мм ала, виридалайни екедал — саки 5 см.
— Цекверин “мукьва-кьилияр” хузарни чIижер яз гьисабзава.
— Зегьметкеш цеквер 3 йисуз кьван яшамиш хьун мумкин я.
— И гьашаратри бязи вахтара маса цеквер лукIвиле кьада, чпин кIунтI патал кIвалахуниз мажбурда.
«Лезги газет»
