Лацу халат алайбур
Инсанрин къилихар, хесетар хьиз, абуру хкязавай пешеярни жуьреба-жуьре я. “Гьи пеше инсанар, общество патал гзаф герекди, важиблуди я?” — лагьай суалдиз гьарда са жуьре жаваб гуда. РикIел Лезги Няметан шиирдин цIарар къвезва: “…ТиртIа са ферли кIвалерин устIар, хкаждай виниз зегьметди зи тIвар… Гзаф гудай за ватандиз хийир, гъилер — фяле, рикI кIвалах хьанайтIа…”.
Чи фикирдалди, медицинадин работникрин кIвалах виридалайни герекди, важиблуди тирди садавайни инкариз жедач. Хъсандиз кIвалахзавай медицинадин са къуллугъчидикай багъри “Лезги газетдиз” макъала кхьинин фикир аваз, чун Сулейман-Стальский райондин больницадин кьилин духтурдин везифаяр вахтуналди тамамарзавай Мевлидин Алиомарован патав фена. Амма хъсандиз кIвалахзавай, агьалийрин патай гьуьрмет авай медработникдин тIвар кьун адаз регьят акъвазнач: нин тIвар кьан, нин — такьан? Тежрибалу, хиве авай везифаяр намуслудаказ кьилиз акъудзавай пешекарар ЦРБ-да гзаф ава. Гьа и арада, рак гатана, кабинетдиз къужахда 5-6 варз хьанвай аялни аваз са дишегьли атана.
— Мевлидин стха, зун аял гваз больницада тамам са гьафте хьана, — лагьана дишегьлиди. — Вири и йикъара зи аялдихъ Мадина Муслимовнади чешнелу гелкъуьн тешкилна. Аял сагъ хъхьана, чун кIвализ хъфизва. Чна Мадина духтурдиз ва аялрин отделенидин вири медработникриз чухсагъул лугьузва.
Вич “кIевяй” акъудайди гьисс авур Мевлидин Алиомарова, чина тIимил хъверни аваз, алава хъувуна: “Куь суалдиз им зи патай жавабни хьурай. Гьакъикъатдани, Мадина Муслимовна хъсан пешекар, рикI михьи инсанни я”.
Райбольницадин аялрин отделенидин заведующийвиле кIвалахзавай Мадина Мамеева чазни тежрибалу духтур, хъсан инсан яз фадлай чизвай.
Катран мукай кард къарагъда лугьудайвал, Мадина хуьре, районда чпиз халкьдин патай еке гьуьрмет авай сийидвияр тир Муслиман ва Абидатан чIехи хизанда дидедиз хьана. 4-классдал кьван руша Сийидрин хуьре кIелна, 10-класс къуншидаллай Курхуьрел акьалтIарна.
М.Мамеевади лугьузвайвал, духтурвилел адан гъвечIи чIавалай рикI алай. Школа акьалтIардайла кхьей сочиненидиз “Закай духтур жеда” кьил гунни дуьшуьшдин кар тушир. Гьа икI, 1976-йисуз юкьван школа лап хъсан къиметар аваз акьалтIарай руш Дагъустандин медицинадин институтдин педиатриядин факультетдик экечIна. 1982-йисуз анаг акьалтIарна, зегьметдин рехъ Махачкъалада аялрин 2-нумрадин поликлиникада кIвалахунилай башламишна. И везифаяр Мадина Муслимовнади 4 йисуз намуслудаказ кьилиз акъудна.
1986-2005-йисара М.Мамеевади Кьасумхуьруьн больницадин садакай масадак акатдай азаррин отделенида духтур-инфекционист яз кIвалахна. Гиппократан кьинез вафалувал къалурзавай духтур, масадан дердиникай хабар кьадай инсан тир Мадина Муслимовна, больницадин руководстводи, амай медработникри теклифуналди, ЦРБ-дин аялрин отделенидин заведующийвиле тайинарна. Жавабдар и везифаяр ада уьзягъдаказ кьилизни акъудзава.
М.Мамеевади чаз лагьайвал, аялрин отделенида медицинадин 15 къуллугъчиди кIвалахзава. Абурухъ виридахъ кIвалахдин гзаф йисарин тежриба ава. Кьилди къачуртIа, отделенидин пешекарар са вацралай 18 йисал къведалди яшара авай аялрин сагъламвилин къаравулда акъвазнава.
Чаз акурвал, аялрин отделение капитальнидаказ ремонтнава, ана михьи ва экуь я. Отделенида 33 чарпайдин чкаяр ава, палатаяр герек вири шейэралди таъмин я. Дарманар, рапар, герек маса затIарни авазва. Азарлуяр сагъар хъувунин жигьетдай ФОМС-ди гузвай планарни отделениди тамамарзава. Вири и кIвалахрик, гьелбетда, Мадина Муслимовнадин зегьметдин ва чалишмишвилерин еке пай ква.
Чаз отделенидин палатайра начагъ аялар гвай дишегьлийрихъ галаз ихтилатардай мумкинвални хьана. ИкI, А.Мегьамедовади, Р.Селимовади ва масабуру лагьайвал, Мадина Муслимовна ва отделенидин медсестраяр азарлу аялрихъ хъсандиз гелкъвезва, абурун гьакъиндай кьетIен къайгъударвал ийизва.
— Дарманрикай, рапарикай хьиз, аялриз Мадина духтурдин ширин мецекай, кьезил гъиликайни куьмек жезва. БицIекар сагъар хъувуна, чи рикIер шадарзавай Мадина Муслимовнадихъни шадвал кутадай крар, рикIин динжвал хьурай! — алхишна дидейри.
М.Мамеевади чаз лагьайвал, коронавирусдин тIугъвалди, вири медработникрин хьиз, аялрин отделенидин духтуррин къайгъуярни артухарнава. ЯтIани абуру ажузвалзавач, хиве авай везифаяр намуслудаказ кьилиз акъудзава.
Мадина Муслимовнадин яргъал йисарин намуслу зегьмет Дагъустан Республикадин здравоохраненидин министерстводин, райондин больницадин руководстводин гьуьрметдин грамотаяр ва пешекарвилин рекьяй кьилин категория гуналди къейднава.
— Азарлу яз больницадиз гъайи аялар сагъар хъувуна кIвалериз рахкурун — им духтурар патал виридалайни чIехи шабагь я, — лугьузва Мадина Муслимовнади.
Чи мурадни Мадина Мамеевадихъ четин, гьа са вахтунда виридалайни важиблу ва гзаф гьуьрметлу духтурвилин кIвалахда мадни еке агалкьунар хьун я.
Асият Мирзалиева,
Хазран Кьасумов
