Дагъустандин здравоохраненидин министерстводи республикадин духтурханайра коронавирус акатнавайбур кьабулдай алава чкаяр кардик кутазва. Ведомстводин приказдин бинедаллаз, медицинадин са шумуд идара, шаз хьиз, ковид-госпиталриз элкъуьрдайвал я. Абурун жергедик РБВЛ-ни (Республиканская больница восстановительного лечения) акатнава.

Къейд ийин хьи, и духтурханадин стационарда, санлай къачурла, 240 чарпай ава, абур вири кислороддалди таъминарнава. Ина медицинадин рекьяй алай аямдин цIийи технологияр кардик ква, гьа жергедай яз компьютердин томографни. Духтуррин гафаралди, ихьтин томографди пешекарриз, энгел тавуна, духтурханадив агакьарзавай коронавирус акатнавайбур стIалжем хьанвани, хьанвачни тайинардай мумкинвал гузва.

РикIел хкин, РБВЛ виликдай кьве сеферда ковид-госпиталдиз элкъуьрнай: алатай йисан гатфариз ва зулухъай. Ина 1000-дав агакьна коронавирусдик начагъбур сагъар хъувуна.

РБВЛ-дин кьилин духтур Нурмегьамед Загайлован гафаралди, духтурар­ исятдани фендигар тIегъуьндиз акси женгиник экечIиз гьазур я.

«Лезги газет»