Чарасуз серенжемар
Алай вахтунда санлай Россияда 23 миллиондилайни гзаф ксари коронавирусдиз акси сифте рапар янава. Уьлкведин здравоохраненидин министр М.Мурашкодин делилар “ТАСС” чешмеди раижнава.
Хабар гузвайвал, эхиримжи йикъара Россиядин регионриз 9 миллиондилай гзаф вакцинадин комплектар пайнава.
Къейд ийин, коронавирусдиз акси рапар ягъун чарасуз серенжем яз малумарнавай регионрин кьадар артух жезва. ИкI, Москвадин гьукумдаррилай чешне къачуна, хейлин регионрин регьберри вирусдин цIийи штаммдик начагъ жезвайбурун кьадар тIимиларунин макьсаддалди агьалийри рапар ягъун герек тирди тестикьарзава.
Хейлин чешмейрин делилралди, Кемероводин, Ленинграддин, Москвадин, Мурманскдин, Сахалиндин, Нижний Новгороддин, Туладин, Твердин, Брянскдин, Магадандин областра, Москвада, Ненецкий АО-да, Санкт-Петербургда, Бурятияда, Алтайда, Хакасияда, Краснодардин крайда ва масанра бязи ватандашар патал чарасуз вакцинациядин серенжем къуватда тунва.
Тагькимарзава
Евросоюзди Россиядиз акси яз цIийи санкцияр кардик кутадайвал я. Идан гьакъиндай Евросоюздин дипломатиядин кьил Ж.Боррела лагьанва, — хабар гузва “ТАСС” чешмеди.
Адан гафаралди, ЕС-ди Москвадихъ галаз алакъаяр тешкилдай къайдаяр тайинарзава. ЦIийи серенжемар, гуя Россияди ЕС-дик квай уьлквейра международный къайдаяр чIурунин гьерекатар давамарайтIа кардик кутада лугьуз, гьелягьар кьунин жуьреда тагькимарзава.
Идалай вилик ЕС-дин саммитдин иштиракчийри Украинадин гьаларихъ галаз алакъалу яз кардик кутунвай Россиядиз акси экономикадин санкцийрин муддат артухар хъувунин къарар кьабулнай.
Лайихсуз амадаг
Вашингтондин машгьур вуздин алимдин фикирдалди, США патал Украина хатасузвал авачир ва лайихсуз амадаг я. Адан гафар “The NationaI Interest” чешмеди раижнава.
Кьилди къачуртIа, ада Украинада агьалийрин ихтиярар ва азадвал хуьнин месэлаяр вилив хуьзвай тегьердиз пис къимет гана. Адан гафаралди, Киевди США герек авачир дявейрик кутун мумкин я.
Идалай вилик малумарайвал, военный рекьяй гузвай куьмекрин сергьятра аваз, США-дин президентдин администрацияди Украинадиз 150 миллион доллар чара ийида.
Есирриз талукь шартI
Эрменистандин парламентдин депутат Наира Зограбяна Бакудин терефди военный есирар вахкуниз талукь яз малумарнавай шартI раижна. Идакай “Sputnik Армения” чешмеди хабар гузва.
Адан гафаралди, ПАСЕ-дин заседанидилай кьулухъ ада Азербайжандин делегациядин кьил Самед Сеидовахъ галаз ихтилатна. С.Сеидова адаз Азербайжанда есирар амач лагьана, республикадин мулкара авай военный эрменийри лагьайтIа, адан фикирдалди, терактар кьилиз акъуднава.
“Сеидова лагьана хьи, эгер Эрменистанди ислягьвилин икьрардал къул чIугуртIа, яни Азербайжандин мулкарин битаввал, гьа жергедай яз Арцахдин мулкарин 75 процентни документдалди тестикьарайтIа, “террористар” элкъуьрна вахкуниз талукь месэла веревирдда”, — раижна депутатди Бакудин терефдин шартI.
Ватандашрин ихтиярар хуьзвай векилрин делилралди, Азербайжанда алай вахтунда 200-дав агакьна эрменияр есирвиле ама.
Алакъаяр атIанва
Туьркиядин гьукумдарри коронавирусдин азардин цIийи штаммар чкIанвайвиляй ругуд уьлкведихъ галаз вахтуналди авиациядин алакъаяр атIанва. “Лента.ру” чешмеди раижзавайвал, ихьтин малумат а уьлкведин МИД-дин сайтда кхьенва.
Кьилди къачуртIа, 1-июлдилай Бангладеш, Бразилия, Непал, Индия, Шри-Ланка ва ЮАР уьлквейрихъ галаз авай авиаалакъаяр акъвазарда. Къейднавай уьлквейрай Туьркиядиз хтай ватандашар патал кьве гьафтедин карантин малумарда.
Туьркиядиз Россиядин “Спутник V” вакцина агакьарнавайдакай са гьафте идалай вилик малумарнай.
Гьалар четин я
Меркездин кьил С.Собянина “ТАСС” чешмедиз малумарайвал, коронавирусдихъ галаз алакъалу гьалар Москвада лап четин хьанва, шегьеррин азарханайра саки 15 агъзур чарпай начагъбуру кьунва.
Адан гафаралди, эхиримжи йикъара COVID-19 акатзавайбурун кьадар артух хьанва.
Трампа гайи зиянар
США-дин президент Ж.Байденан гафаралди, виликан президент Д.Трампа международный алакъайриз еке зиян гана. Адан фикир “The Washington Post” раижнава.
Байден терефдаррихъ галаз гуьруьшмиш хьайи вахтундани Трампа цIийи президентдин кIвалахдиз пис къимет гана. Трампан гафаралди, президент тир вахтунда вичи гуя “Северный поток-2” газопровод туькIуьрунин кIвалахар акъвазарна, амма Байдена и жигьетдай бушвал къалурзава.
«Лезги газет»
