Коронавирусди Дагъустанда мад кьил хкажнава. Эгер йисан эвел кьилера йикъан къене и азардик начагъ жезвайбурун кьадар 30-40 кас тиртIа, алай вахтунда и рекъем 130-140-дав агакьнава. Бязи духтурханайра коронавирус акатнавайбур кьабулдай чкаяр бес жезвач. Ихьтин гьалар фикирда кьуна, здравоохраненидин министерстводи начагъбур патал кьилдин духтурханайра алава чкаяр арадал гъизва. ТIегъуьндин вилик пад кьун патал бязи районра тамам хуьрерни кваз агалнава…
Коронавирусдин вилик пад гьикI кьада? Адан винел гъалибвал къачуз жедай яракь авачни? Духтурри, пешекарри гьисабзавайвал, тIугъвалдихъ галаз акси женгина виридалайни гужлу къуват адаз акси раб ягъун я. Махачкъалада авай алишверишдин са карханада кIвалахзавай Замир Алиевани гьакI фикирзава. Ада са кьадар вахт идалай вилик вакцинация авуна.
— Коронавирус акат тавун патал кьабулзавай серенжемрикай виридалайни менфятлуди раб ягъун я, — лугьузва З.Алиева. — За алишверишдин хиле кIвалахзава. Гьавиляй йикъан къене вишералди инсанрихъ галаз алакъада жезва. Абурукай азарлуди вуж я, сагъди вуж я тайинариз жедач. И кар фикирда кьуна, жув ва жуван хизан сагъ-саламатдиз хуьн патал за коронавирусдиз акси раб ядай къарар кьабулна. Раб ягъай сифте йикъара за жув са тIимил галат хьанвайди хьиз гьиссна. Амма гуьгъуьнлай цицIи хъхьана, рапуни зи бедендиз пис патахъай таъсирна лугьуз жедач. За жуван дустаризни, чирхчирризни раб ягъуниз эвер гузва, — алава хъийизва ада.
Гьакъикъатдани, коронавирусдикай хуьнин карда раб ягъунихъ еке метлеб авайди неинки са чи, гьакIни къецепатан хейлин уьлквейрин пешекарри тестикьарнава. Урусатда и тIегъуьндиз акси яз акъуднавай рапар еридал гьалтайла дуьньяда хъсанбурукай садбур яз гьисабзава. КIанзавайди, духтуррин меслятрал амал авуна, раб ягъун я. Замир хьтинбурулай чешне къачу!
Чи мухбир
