РД-дин физический культурадин ва спортдин министерстводин сайтда хабар ганвайвал, и йикъара Дагъустандин Кьилин везифаяр вахтуналди тамамарзавай Владимир Васильев “Россиядин кьуршахар кьунай спортдин федерация” Вирироссиядин общественный организациядин президент Михаил Мамиашвилидихъ ва “Кьуршахар кьунай сад хьанвай алем — Европа” международный федерациядин вице-президент Георгий Брюсовахъ галаз гуьруьшмиш хьана. Мярекатда РД-дин Гьукуматдин Председатель Артём Здунова, адан Сад лагьай заместитель Анатолий Къарибова, РД-дин физический культурадин ва спортдин министрдин везифаяр вахтуналди тамамарзавай Мегьамед Мегьамедова, Дагъустандин азаддаказ кьуршахар кьунай хкянавай командадин кьилин тренер Сажид Сажидова ва масабуру иштиракна.
Гуьруьшдал алай йисан апрелдин эхирриз ва майдин эвел кьилера Каспийскда, Али Алиеван тIварунихъ галай Спортдинни жегьилрин дворецда, кьуршахар кьунин спортдин жуьредай кьиле фидай Европадин чемпионатдиз гьазурвал аквазвай гьалар, вилик кумай четин месэлаяр веревирдна. ИкI, чемпионат кьиле физвай вахтунда республикадиз къведай алава авиарейсер кардик кутуниз, турнирдин иштиракчийрин хатасузвал таъминаруниз ва маса серенжемриз талукь месэлайрикай рахана.
Дагъустандин Кьилин везифаяр вахтуналди тамамарзавайдан гафаралди, республикадин вилик четин ва гзаф жавабдар везифа акъвазнава. Ада мадни къейд авурвал, и дережадин акъажунар — Европадин чемпионат — неинки са Дагъустанда, гьакIни Кеферпатан Кавказдин федеральный округдани сад лагьай сефер яз кьиле тухузва.
— Чун патал им еке ихтибарвал ва жавабдарвал я. Ина кIватI хьанвай ксариз чемпионатдиз гьазурвал акунин мураддалди кьилиз акъуднавай кIвалахрай сагърай лугьуз кIанзава. Россиядин кьуршахар кьунай спортдин федерацияди чаз авунвай еке ихтибарвал чна виниз тир дережада аваз кьилиз акъудда, — инанмишарна В.Васильева.
Гуьруьшдал Али Алиеван тIварунихъ галай Спортдин ва жегьилрин дворецда са зал хейлин чIехи авунвайди, VIP-трибунаяр, арбитрар ва СМИ-рин векилар патал трибунаярни цIийикIа туьхкIуьр хъувун давам жезвайди раижна. Идалайни гъейри, турнирдин иштиракчияр, судьяяр, кьуршахар кьунай международный федерациядин делегатар, журналистар ва мугьманар яшамиш жедай кьилин мугьманханаяр тайинарнава. Анра багьа мугьманар лайихлудаказ кьабулун патал гьазурвилер аквазва. Республикада важиблу акъажунар кьиле тухудайла алакъа хъсанди хьун, кьилди къачуртIа, йигин Интернетдалди таъминарун патални еке кIвалах тухузва. Идахъ галаз сад хьиз, Европадин чемпионатдин сайт кардик кутунва. Анай урус, ингилис ва француз чIаларалди хабарар гуда. Мадни чемпионатдиз конкурсдин бинедаллаз 250 волонтёр хкянава. Лазим хилерай кIвалахун патал абур гьазурдай семинаррин план туькIуьрнава. ДГУ-дин ва ДГПУ-дин студентрикай ингилис ва француз чIалар чизвай 40 студент хкянава. Абуру волонтёррин-таржумачийрин еринда аваз къецепатан уьлквейрай атанвай делегацийрихъ галаз кIвалахда.
Вичин рахунра Михаил Мамиашвилиди важиблу вакъиа тешкилунин ва кьиле тухунин кардал машгъул ксари вилик эцигнавай месэлаяр кьилиз акъудун патал рикIивай зегьмет чIугун тIалабна.
— Гьуьрметлу Владимир Абдуалиевич, Артём Алексеевич, чна вирида чи хивез еке жавабдарвал къачунва-Россиядиз ва дуьньядиз Кеферпатан Кавказ ва Дагъустан чаз абур акуна кIанзавай тегьерда къалурунин. Зун инанмиш я, и зурба месэла чна кьилиз акъудда. Гьеле къемаз диде-бубайри чпин веледар уьлкведин муькуь патаз, гьа гьисабдай яз Кеферпатан Кавказдиз, спортдин акъажунра иштиракун патал рекье твазва. Им гзаф важиблу я, — къейдна ада. Вичин лап кIеви графикда чемпионат тешкилуниз талукь месэлаяр гуьзчивилик кутунай В.Васильеваз сагърай лагьана.
Эхирдай чемпионатдиз гьазурвал акунин кIвалахда амай сад-кьве четин месэладални акъвазна, абур лап гьа и йикъара арадай акъуддайдахъ инанмишарна.
Гьазурайди — Рагнеда Рамалданова
