Чи ватанэгьлияр — гьар сана
Алий йисан мартдиз Москвада кардик квай “Градский Холл” театрдин залда чи ватанэгьли, РД-дин лайихлу артист, “Голос” телепроектдин гъалибчи Селим Алагьярован кьилдин концерт кьиле фена.
Селим дуьньядин дережадин музыкадин Олимпдал хкаж жезвай гъед тирди тестикьаруналди, концерт Россиядин халкьдин артист А.Б.Градскийди ачухнай. Чи манидарди хайи чIалал “Чан диде”, “Зи хайи чил” (композитор — М.А.Гьуьсейнов) маниярни тамамарна. Пуд сятда давам хьайи чIехи концертдикай гзаф рахадач зун. Зун и жегьил манидардин бажарагъдал гьейран я.
Селиман диде Мая Асимовнадихъ галаз за дуствал хуьз йисалайни гзаф я. И дишегьлидин сабурлувилел, хцин тереф хуьнал, ада кьил кутазвай вири крарик къуьн кутунал за гьейранвалзава. Мая Алагьяровадихъ галаз ихтилатарайла, заз артиствилин рекье Селимал акьалтай четинвилерикайни арадал атай агалкьунрикай итижлу делилар чир хьана. Эхь, яргъал ва регьят тушир рекьи, агалкьунрин кукIушрив агакьунин майилвили дамах ийиз жедай хьтин нетижаярни арадал гъана. Сад лагьай каналди тешкилзавай “Голос” проектда къачур гъалибвал дурумлудаказ зегьмет чIугунин нетижа тушни бес!
С.Алагьярован алакьунриз А.Ведерников, А.Градский, Л.Казарновская хьтин музыкадин искусстводин магьир устадри еке къимет гана, ам Россиядин лап хъсан сес (баритон) авайбурукай сад тирди къейдна.
Селиман тикрар тежер, вичиз хас жуьредин сесини Хосе Каррерас, Робертино Лоретти, Ивонн Кальман ва дуьньядин машгьур хейлин манидарар тажубарна.
Суьгьбетдин вахтунда заз чир хьайивал, мукьвара Селима Москвада “Манияр тамамарунин Селим Алагьярован академия ASA” хсуси школа ачухнава. Алатай йисуз, коронавирусдин тIугъвал себеб яз, Да0гъустанда адавай концертар гуз хьанач. ЦIи адаз уьлкведин жуьреба-жуьре шегьерра, Дагъустанда кьилдин концертар гудай фикир ава.
Са кардин гъавурда зун акьазвач: еке бажарагъ авай, гегьенш “Голос” телепроектда гъалиб хьанвай сад лагьай дагъустанвидиз республикадин гьукуматди са жуьрединни куьмек гузвач. Неинки тарифар авун, гьакI гьакъикъи краралдини ихьтин лайихлу касдиз меценатвилин куьмекар гун, адан яратишунрикай газетрани сетра кхьин лазим я. И жегьилдивай чи республика лап вини дережайра машгьуриз жеда.
Интернетдин сайтра кьетIен манидардиз гзафбуру хуш гафар кхьенва, адан бажарагъдиз икрамзавайбурун кьадар датIана артух жезва.
Четинвилеризни килиг тавуна, Селима дуьньядин машгьур сегьнеяр муьтIуьгъарун герек я. Чна адан манийрикай лезет хкудзава. Ам дуьньядин машгьур гъед хьуниз лайихлу я.
Теяра Велиметова,
Россиядин писателрин Союздин член,
“Московиядин къизилдин къелемдин” сагьиб,
“Лезги газетдин” штатдик квачир мухбир
