Партиядин ХХ съезд
19-июндиз Москвада “Сад тир Россия” партиядин ХХ съезд кьиле фена. Ана Россиядин Президент Владимир Путина, партиядин Председатель Дмитрий Медведева, партиядин кьиле авайбуру, регионрин регьберри, регионрин отделенийрин секретарри ва делегатри иштиракна. Дагъустандай съезддиз РД-дин Кьилин везифаяр вахтуналди тамамарзавай Сергей Меликов (ам гьакI “Сад тир Россиядин” Дагъустандин отделенидин секретарни я) ва партиядин чкадин отделенийрин патай хкянавай 20 делегат фенвай.
Владимир Путина делегатар тебрикна ва алай йисан декабрдин вацра «Сад тир Россия» партияди вичин 20 йис тамам хьун къейд ийидайдакай хабар гана. Партия тарифлу рехъ фенва, и вахтунда адаз майилвалзавай терефдаррин кьадарни артух хьана.
Государстводин Кьилин гафаралди, партияди вири дережайрин сечкийра лайихлу чкаяр кьуна ва адахъ жергеяр цIийи хъувунин, датIана вилик финин карда алакьунар авайди успатна. “Гьар йикъан кIвалахда ва Ватан патал кар алай месэлаяр гьялдайла, партиядин векилри, ватанпересвилин гьисс кваз, еке жавабдарвал къалурзава. Гьуьрметлу коллегаяр, и кардай заз квез сагърай лугьуз кIанзава”, — лагьана РФ-дин Президентди.
Владимир Путина гьакIни рикIел хкана хьи, “Сад тир Россия” партияди сифте нубатда яшайишдин хилез гзаф фикир гузва. Идан гьакъиндайни сиясатдин объединенидин депутатри Госдумадиз теклифай законрин проектри шагьидвалзава.
“Сад тир Россия” партияди мукьвал йисара фикир гана кIанзавай крарикай рахадайла, государстводин Кьили къейд авурвал, кьилин фикир регионра тухузвай кIвалахдиз гана кIанда. Лап важиблу, метлеблу крарикай сад аялар галай хизанриз ва жегьилриз государстводин патай куьмек гун я. Гьа са вахтунда экономика, здравоохранение, образование вилик тухунни, халкьарин менфятлу адетар мягькемарунни чарасуз месэлайрик акатзава. Идахъ галаз сад хьиз, Владимир Путина РФ-дин Гьукуматдал ва партиядал вад йисан вахтунда школаяр капитальнидаказ ремонт авунин программа гьазурун тапшурмишна.
Фикирда авай и крар кьилиз акъудун патал Президентди рекьер ремонт авун патал регионриз алава яз 30 миллиард манат ва чиркин ятар михьдай имаратар эцигуниз ва цIийи хъувуниз 150 миллиард манат чара ийидайдакай лагьана. Государстводин Кьили партияди вичин авторитет мадни мягькемардайдак, инсанрин патай ихтибар артухардайдак, терефдаррин кьадар гзафардайдак ва алай аямдин истемишунриз жаваб гудайдак умуд кутуна.
Партияди сечкийрилай вилик тухузвай кIвалахдиз талукь программадикай “Сад тир Россия” партиядин Председатель Дмитрий Медведева суьгьбетна. “Чи макьсад государстводин Кьили чи вилик эцигнавай везифаяр вахтунда, еридивди ва тамамвилелди тамамарун я. Сечкийрилай виликан кIвалахдиз талукь яз вири дережайра инсанрихъ галаз веревирдер авуна кIанда. Им чи партиядин гьар са векилдиз талукь месэла я”, — къейдна Дмитрий Медведева.
Адан гафаралди, алатай 20 йисан вахтунда партиядилай менфятлу къарарар кьабулиз ва кризисдин гьалар алудиз алакьна. Ада алава хъувурвал, кIвалахда кьилинди инсанрихъ галаз рафтарвал авун, инсанри къарагъарзавай месэлаяр гьялун патал абурун дерди-гьал чир хьун лазим я.
Съезддин делегатри 19-сентябрдиз кьиле фидай сечкийра иштиракдай “Сад тир Россия” партиядин патай Госдумадиз депутатарвиле кандидатрин сиягь тайинарна. Дагъустан Республикадин Кьилин везифаяр вахтуналди тамамарзавай Сергей Меликов Дагъустандин патай “Сад тир Россиядин” региональный дестедин кьиле акъвазнава. Аник мад Нурбаганд Нурбагандов, Сайгидпаша Умаханов, Хизри Абакаров, Артем Бичаев, Бийсултан Хамзаев, Мамед Абасов, Кубатай Масуев, Елена Павлюченко акатзава.
Пленарный заседанидилай гуьгъуьниз Сергей Меликова журналистрин суалриз жавабар гана. Ада къейд авурвал, хейлин вахтунда аппаратдин руководстводин ва агьалийрин арада дуьм-дуьз алакъа авачир. И жигьетдай метлеблуди ам я хьи, агьалийриз вуч кIанзаватIа, абурук куь секинсузвал кутазватIа, гьихьтин месэлайри рикI дарихарзаватIа чир хьана кIанда. Гьа икI кIвалахун чавай государстводин Кьилини истемишзава. Чна агьалийрин агьваллувал, яшайиш хъсанарун патал зегьмет чIугуна кIанда, — лагьана С.Меликова.
«Лезги газет»
