5-мартдиз Сулейман-Стальский райондин Цlийи Макьарин хуьруьн ктабханада 7-8-классра кlелзавай аялрин иштираквал авай, Етим Эминан шиирар лап хъсандиз кlелунин конкурс кьиле фена. Шииратдин мярекат Етим Эминан Йисан ва ам дидедиз хьайидалай инихъ 180 йис тамам хьунин юбилейдин сергьятра аваз тешкилнавай.

Конкурс хуьруьн ктабханадин заведиш Милейсат Ибрагьимовади халкьдин рикl алай шаирдин кьисметдикай метлеблу ва итижлу ихтилат авунилай эгечlна.

Конкурсдин вахтунда аялри Етим Эминан машгьур шиирар фасагьатдаказ кlелна. Кlелунин рекьяй сухтайрин устадвилиз жюриди дестеди къимет гана. Жюридин дестедик Цlийи Макьарин хуьруьн кьилин заместитель А. Рагьимханова, хайи чlалан муаллим Д. Мегьамеднабиева, ктабханадин заведиш М.Ибрагьимова квай.

Нетижада 1-чка Саид Жабраиловани Абдулагь Фатулаева чпин арада пайна, 2-чка Амина Идрисовадиз гана, пуд лагьай чка – Диана Гьуьсейновадиз.

Куругъли Ферзалиев