2018-йисан 6-февралдиз 50 йисан яшда аваз “Дагагропромстрой” АО-дин генеральный директор, Россиядин Федерациядин гьуьрметлу эцигунардайди тир, хъсан кас, хизандин кьил, мергьяматлу ва масадан дердиникай хабар кьадай дуст, истемишунардай руководитель Исамудин Мегьамедрасулович Мегьамедов садлагьана кечмиш хьана.
И.М.Мегьамедов 1968-йисан 19-октябрдиз Хив райондин Хиврин хуьре дидедиз хьана.
В.В.Куйбышеван тIварунихъ галай Москвадин Зегьметдин Яру Пайдахдин орден авай инженервилинни эцигунардай институт куьтягьай 1992-йисан сентябрдилай ада вичин зегьметдин рехъ гзаф терефрин “Самур” фирмадин коммерческий директорвилелай башламишна, 1994-йисан сентябрдиз “Неосистема” НПП-да прорабвиле кIвалахна.
1995-йисан октябрдилай вичин уьмуьрдин эхиримжи йикъаралди ада “Дагагропромстрой” объединенида прораб, кар алай инженер, кьилин пешекар, генеральный директордин заместитель, генеральный директор яз кIвалахна.
Адан иштираквал аваз ва регьбервилик кваз Дагъустан Республикадин Ботлих, Буйнакский ва Новолак районра школаяр, больницаяр, яшайишдин кIвалер эцигна, гьакIни Россиядин Федерацияда — Саха — Якутия Республикадин Ленск шегьерда 2001-йисуз хьайи тIебиатдин бедбахтвилерилай гуьгъуьниз кIвалер, школаяр, аялрин бахчаяр цIийи кьилелай эхцигна, Краснодарский крайда ва Адыгея Республикада тIебиатдин бедбахтвилерин нетижаяр арадай акъудна, Ставропольский крайдин Буденновск шегьерда МО-дин объектар, РФ-дин кьиблепатан регионда — Чечен Республикада “Мешехи” пограничный застава ва Краснодарский крайдин Адлер поселокда ПОГЗ-дин “ПСОУ”, Сочида олимпиададин объектар ва маса дараматар эцигдайла, активнидаказ иштиракна. Эхиримжи вахтунда Крымдин муьгъ эцигдайла, куьмекдин объектар хкажунин карда иштиракна.
Исамудин Мегьамедрасуловича, гьина кIвалахнатIани, вичин везифаяр намуслувилелди тамамарна, коллективдин арада адаз гьуьрмет, авторитет авай. КIвалахдин рекьяй амадагар ва дустар тежрибалу регьбердикай, масадан дердиникай хабар кьадай дустуникай, хизан лагьайтIа, кIани уьмуьрдин юлдашдикай, бубадикай магьрум хьана.
“Дагагропромстрой” объединенидин коллективди Исамудин Мегьамедрасулович Мегьамедован хизандиз, мукьва-кьилийриз ва багърийриз, дериндай хажалат чIугунивди, башсагълугъвал гузва. Адан экуь къамат чи рикIера гьамишалугъ амукьда.
