Са тIимил йикъар идалай вилик  Мегьарамдхуьре жегьил боксёррин арада райондин ачух турнир кьиле фена. Акъажунра Ахцегьрин 2-нумрадин спортшколадин тренер Нариман Ильясован гъилик вердишвилер къачузвай жегьил боксёррини иштиракна. Къизгъин бягьсерин нетижада Ахцегьрин командадик квай са шумуд  боксёр: кIвенкIвечи чкаяр кьуналди тафаватлу хьана.

ИкI, 1-чкайриз лайихлу хьайибурун ­арада Байрамбегов Максим (54 кг) ва Хизриев Салман (36 кг) ава. Ильясов Руслан (44 кг), Бабаев Гьашум (47 кг), Абдулризаев Мадрид (52 кг), Гьажиев Асгьаб (54 кг), Шерифалиев Рамазан (60 кг) 2-чкайриз лайихлу хьана.

Чна жегьил боксёрризни абурун диде-бубайриз ва, гьелбетда, вичин жавабдар пешедив рикI гваз эгечIзавай тренер Нариман Ильясоваз агалкьунар рикIин сидкьидай мубаракзава. Къуй квехъ чандин сагъвал ва спортдин рекье мадни еке агалкьунар хьурай!

Дашдемир  Шерифалиев