И мукьвара Ханты-Мансийскда залан атлетикадай кьиле фейи Россиядин чемпионатда вичин ери-бине Докъузпара райондай тир кьегьал хва Исмаил Гьажибегова 55 кг-дал къведалди заланвал авайбурун арада чемпионвилин тIвар къазанмишна. Шадвилелди мадни а кар къейд ийиз кIанзава хьи, Дагъустандин залан атлетикадин цIийи тарихда ам, чи республикадин патай экъечIуналди, Россиядин чемпионвилин тIварцIиз лайихлу хьанвай сад лагьай спортсмен я. (РикIел хкин: вичин ери-бине Хив райондин ЗахитIрин хуьряй тир Феликс Халибегов спортдин и жуьредай Россиядин са шумудра чемпионвилин тIварцIиз лайихлу хьана, ада вичикай Европадин ва дуьньядин майданрани хабар ганва. Ам Москвадин ва Санкт-Петербургдин патай экъечIзава)…
Чаз малум тир делилралди, тренер Гьуьсейхан Закарьяеван гъилик вердишвилер къачузвай Исмаила (адан 26 йис я) къазанмишнавай им сад лагьай чIехи агалкьун туш. Идалай вилик ада Россиядин чемпионатра 3 сеферда иштиракна, гьар сеферда ада вичин устадвални алакьунар мадни артухарна. ИкI, 2020-йисуз Грозный шегьерда кьиле фейи уьлкведин чемпионатда ада гимишдин (а чIавуз ада рывокда — 97кг, толчокда 124 кг хкажнай) медаль къазанмишна. Идалай вилик квай йисара ада 6 ва 4-чкаяр кьунай. Исмаил Россиядин Кубокдин (2021-йис) сагьибни я.
Россиядин чемпионатда И.Гьажибегова санлай 230 кг (рывок -100, толчок -130 кг) хкажна. Инал уьлкведин Кубок патал акъажунар (винидихъ тIвар кьунва) рикIел хкун кутугнава. ГьикI хьи, Россиядин чемпионатдани Исмаила алай йисан февралдиз Старый Оскол шегьерда Кубок патал кьиле фейи акъажунра (рывокда -105, толчокда -125) къалурай алакьун тикрар хъувуна. Исмаилахъ галаз гьуьжетда авай Кирилл Рябыха 8 кг-дин тIимил хкажна.
— Россиядин цIийи тарихда чахъ сад лагьай сефер яз залан атлетикадай республикадин тIвар уьлкведин майданда машгьур авур спортсмен хьанва. Исмаил зегьметкеш ва йисалай-суз анжах виликди ялзавай спортсмен я. Ада вичикай мадни гьуьндуьр дережайра хабар гудайдахъ чун кIевелай инанмиш я, — къейдзава Дагъустандин залан атлетикадин федерациядин президент Саид Абдуллаева.
Рагнеда Рамалданова
