Дагъустандин зегьметдин ва яшайишдин рекьяй вилик финин министерстводин пресс-къуллугъди хабар гузвайвал, зигьиндиз зайиф аялар паталди тир “Къайгъударвал” (“Забота”) кIвале-интернатда талукь азаррикди начагъбуруз йикъан отделение ачухзава. Аниз 4-далай 18 йисалди яшара авай аялар пулсуздаказ кьабулда.
ИкI, цIийиз ачухнавай отделенида аялриз гьар юкъуз (ял ядай йикъар квачиз) пакаман сятдин 8-далай нянин сятдин 6-далди ана жедай мумкинвал яратмишнава. КьетIен аялар гьар са дестеда 5-7-далай виниз жедач. Аялриз йикъа 5 сеферда кфетлу тIуьн гуда, абур михьи гьавадал сейрдиз акъудда. Аялрихъ йикъан кьиляй-кьилиз тербиячи, гьар са дестени датIана неврологдин гуьзчивилик жеда. Массаждикай, ЛФК-дикай менфят къачудай мумкинвал ава. ГьакIни абурухъ галаз логопедди, дефектологди, психологди жуьреба-жуьре тарсар (коррекционно-развивающие занятия) тухуда.
Суалар пайда хьайитIа, телефондин агъадихъ галай нумрадиз зенг ийиз жеда: 8-989-879 -02-98.
«Лезги газет»
