Туьркиядини “Спутник V” къачуна
Россиядин “Спутник V” вакцина 14-июндиз сифте яз Туьркиядив агакьна, хабар гузва “Новости” РИА-ди.
Туьркиядин гьукумдарри къейдзавайвал, и вакцинади уьлкведа коронавирусдиз акси рапар ягъун йигинариз, тIугъвал явашаруниз куьмекда. Чешмеди алава хъийизвайвал, эхиримжи 4 юкъуз Туьркияда COVID-19 азар 200 агъзур касдик акатна.
Идалай вилик Туьркиядин здравоохраненидин министр Ф.Коджади зур йисан муддатда Россиядин вакцинадин 50 миллион доза маса къачуникай ихтилатнай.
Есирар азад хъувуна
Эрменистанди Агдам районда 97 агъзур мина квай чкайриз талукь карта малумарайдалай кьулухъ Бакуди Еревандив 15 есир вахкана. Азербайжандин МИД-дин малумат “Лента.ру” чешмеди раижнава.
Азербайжандин терефди малумарзавайвал, минайрин карта гваз хьуни агъзурралди уьлкведин агьалияр къутармишда. “Sputnik Армения” чешмеди хабар гузвайвал, есирар вахкунин гьерекат, Тбилисидин гьукумдин векилрин иштираквални аваз, Азербайжандинни Гуржистандин часпардал кьиле фена.
Идалай вилик Азербайжанда есирда амай вири эрменияр вахкун патал абурун эвезда И.Алиеваз Н.Пашиняна вичин хва Ашот теклифнай.
Лондондинни Москвадин рафтарвилер
Лондонди Москвадихъ галаз алакъаяр хъсанаруник умуд кутазва. “ТАСС” чешмеди раижзавайвал, ихьтин фикир Великобританиядин премьер-министр Б.Жонсона малумарна.
“Зун Россиядин Президент В.Путинахъ галаз гуьруьшмиш хьайила, за адаз чун крар масакIа кьиле тухуз, сих алакъаяр арадал гъуниз гьазур тирди лагьана”, — къейдна ада.
Мягькем сиясатчи
Брюсселда НАТО-дин саммитдин нетижайрай кьиле фейи пресс-конференциядин вахтунда США-дин регьбер Ж.Байдена Россиядин регьбер В.Путин “лайихлу соперник” ва акьуллу, мягькем сиясатчи я лагьана. Идакай “Лента.ру” чешмеди хабар гузва.
16-июндиз Путинни Байден Швейцариядин Женевада гуьруьшмиш хьана.
ТIугъвал
Коронавирусдин тIугъвалди дуьньяда агъавалун саки давам жезва. Бязи уьлквейра эхиримжи вахтара лап татугай гьалар арадал атанва. Гзафни-гзаф вирус акатнавай 10 уьлкведин жергеда сад лагьай чкадал США, адан гуьгъуьнал Индия, Бразилия, Франция, Туьркия, Россия, Великобритания, Италия, Аргентина ва Колумбия ала.
Дуьньяда коронавирус акатайбурун кьадар 177 миллиондив агакьзава, вирусдикди кьейибурун кьадар — 4 миллиондив. Россияда коронавирус акатайбурун кьадар 5 миллиондилай алатнава. Гьа са вахтунда сагъ хъхьанвайбурун кьадарни 4 миллионни 8 виш агъзурдалай алатнава. ТIугъвал себеб яз чи уьлкведа 127 агъзурдав агакьна агьалияр кечмиш хьана. И делилар “koronavirustoday.ru” чешмеди раижнава.
Хъсан ахвар хьун патал
Британиядин духтурди-алимди гатун зегьем авай вахтунда хъсан ахвар атун патал са шумуд меслят къалурнава, хабар гузва “The Independent” чешмеди.
Пешекардин гафаралди, ахвар хъсан хьунин шартIарикай сад бедендинни кьилин чимивилин тафават я: беден чимивиле хьун герек я, кьил — къайивиле. Пакетда туна, ксудайла герек жезвай парчаяр кьве декьикьада морозильникда эцигун теклифзава. Эгер вири ана гьакьзавачтIа, хъуьцуьгандин чин ва алукIзавай перем къайи авун бес жеда. Йифен береда къайи гьал хуьн патал алимди мад са теклиф гузва: атир куьтягь хьанвай шуьшедин гъвечIи къапуна къайи яд цана, гагь-гагь адай чиниз, гардандиз яд хъичич. Авайдалайни чими тахьун патал ксудай кIвале электронный тадаракарни кутун тавун теклифзава. Алимди алава хъийизвайвал, спортдал нянин ваъ, экуьнин вахтунда машгъул хьун важиблу я,
Пешекардин фикирдалди, ахвар хъсан еридинди хьун патал кIвале 16-далай 21 градусдал кьван чимивал хьана кIанда.
Месэладиз килигнач
Коронавирусдин вакцина рапар ягъунин милли пландик-календардик кутуниз талукь законопроектдиз Госдумада килигдач, ам кьулухъ элкъуьр хъувунва. Идакай “Новости” РИА-ди хабар гузва.
ТIвар кьунвай законопроект 8-июндиз парламентда сифте яз веревирднай. Ам теклифзавайбуру, маса хейлин азарриз талукь вакцинайрилай гъейри, коронавирусдиз аксидини милли календардик кутунвай. Къейдзавайвал, ихьтин дегишвилери коронавирусдиз акси дарманар федеральный бюджетдин такьатрихъ маса къачудай мумкинвал гудай.
«Лезги газет»
