Рузидин къимет хкаж тавун
5-июндилай Россиядай вахтуналди гречка маса уьлквейриз акъуд тавунин къарар кьабулнава. Къейдзавайвал, алай йисан 1-сентябрдал кьван и серенжем кардик жеда. Раижнавай делилралди, 2020-йисуз Россияда 892 тонн гречка кIватIна. Алатай йисан рузидин сезонда уьлкведай 40 агъзур тонн гречка маса уьлквейриз маса гана. Алай йисан сезонда лагьайтIа (апрелдин эхирдалди), 104 тонн маса уьлквейриз акъуднава.
ЧIижерхъанриз муштулух
Фадлай вилив хуьзвай “РФ-да чIижерхъанвилин гьакъиндай” къанун 29-июндилай къуватда гьатдайвал я. Сифте нубатда и къанунди чIижер пестицидрикди ва агрохимикатрикди зегьерламиш хьуникай хуьда. Идалайни гъейри, цIийи къанундал асаслу яз, чIижерхъанвилин хилез гьукуматди маса куьмекарни гуда.
Уьлкведин хуьруьн майишатдин министерстводи тестикьарзавайвал, зегьерламиш хьун себеб яз 2019-йисуз 30 регионда гзаф кьадарда чIижер кьена. Алава хъийизвайвал, алатай йисуз уьлкведа 64 тонн вирт арадал гъана.
Пенсияр — анжах “Мир” картадиз
“Мир”системадал элячIун патал алава яз хгай муддат июндиз акьалтIзава. Гьа икI, 1-июлдилай банкривай пенсияр, гьар вацра гузвай маса пулар, дидевилин капиталдин такьатар международный Visa и MasterCard (Maestro) картадиз ракъуриз жедач.
ТIугъвалдихъ галаз алакъалу гьалар фикирда кьуна, агьалияр “Мир” картадал элячIун патал ЦБ-ди пуд сеферда муддат артухар хъувунай.
«Лезги газет»
