12- июндиз чав къара хабар агакьна: чIехи ватанперес, къени инсан, чIехи руьгьдин са­гьиб, “Лезги газетдин” мягькем дестек Загьидин Абдурагьи­мович Ме­гьа­медов чи арадай акъатна.

Загьидин 1940-йисан 6-ноя­бр­диз Гилийрин хуьре дидедиз хьана. Киркарин юкьван школа акьалтIарна, армиядин жергейра пак буржи намуслувилелди кьилиз акъудна. И чIавуз дирибаш жегьилди Кубадиз интернациональный куьмек гунин кардани иштиракна. Армиядай хтайла, Махачкъалада Сепараторрин заводда зегьмет чIугваз, вуз­дик экечIун патал гьазурлухвилин курсара кIелна.

1971-йисуз ДГУ-дин радиотехнический факультет акьал­тIарна, “Конструирование и технология радиотехнической ап­паратуры” рекьяй инженер-конструкторвилин пеше къачуна. Дер­бентда воензаводда, ахпа Мегьарамдхуьруьн электросетра, гуьгъуьнлай 28 йисуз и райондин алакъадин узелдин, поч­тамтдин начальниквиле кIва-лахна.

З.Мегьамедова са шумудра Москвада кьиле фейи совещанийра иштиракна, ам Ташкентда, Ростовда пешекарвал хкаждай курсара хьана. Къанажагълу инсан чи газетдин кIеви дуст, умудлу даях тир, гьар са нумра кIелзавай, тираж хкаж хьуник датIана вичин пай кутазвай. Редакциядихъ галаз яргъал йисара  бегьерлудаказ санал кIвала­хунай ва газетдин 90 йисан юбилейдихъ галаз алакъалу яз Загьидин Абдурагьимович гьуьрметдин грамотадиз лайихлу хьана. Вичин михьи, намуслу зегьметдалди ада еке гьуьрмет, авторитет къазанмишнавай. Загьи­дин 1992-йисан 28-30-августдиз Махачкъалада кьиле фейи ватандашрин международный Конгрессдин иштиракчи хьунини и кардин гьакъиндай шагьидвалзава.

Чна рагьметлудан хизандиз, багърийриз, мукьва-кьилийриз, Гилийрин хуьруьн вири жемятдиз, дериндай хажалат чIугу­нал­ди, башсагълугъвал гузва.

Загьидин Абдурагьимовичан экуь къамат чи рикIера гьамишалугъ яз амукьда.

“Лезги  газетдин” редакциядин коллектив