Алай йисан 2-июндиз хъсан инсан, Лезги театрдин ветеран, камаллу насигьатчи, театрдин педагог, советрин ва Россиядин кинодинни театрдин бажарагълу актер, Россиядин Федерациядин лайихлу артист Магьсудов Абдурашид Гьасанович чи арадай гьамишалугъ яз акъатна. Идакай чи газетдиз театрдин пресс-къуллугъди хабар гана.
А.Гь.Магьсудов 1934-йисуз Кьурагь райондин Цилингдал дидедиз хьана. Мектеб акьалтIарна, ам Дербентдин педучилищедиз гьахьна. Амма жегьилди гьеле мектебда кIелзавай йисарилай сегьнедикай фикирзавай. И мурад кьилиз акъудун яз, А.Магьсудова вичин рехъ культурадин хилехъ галаз алакъалу авун кьетIна. 1951-йисуз ам Москвада ГИТИС-дин актервилин факультетдиз гьахьзава.
Дипломдин кIвалахдихъ галаз алакъалу яз “Седая девушка” ва “Лекарь поневоле” сегьнейра вичин устадвал къалурдайла, Вахтанган театрдин кьилин режиссер Рубен Симонов кьиле авай комиссияди А.Магьсудован бажарагъдиз еке къимет гана.
1955-йисуз Лезги театрдин артистрин чIехи несилди ам ашкъилудаказ чпин жергейриз кьабулна. Жегьил актерди театрдин репертуарда активнидаказ иштиракзавай. Сегьнеда ада арадал гъанвай къаматар гзаф ава, абурун кьадар саки 200-далай виниз я. Хайи театрдиз бажарагълу устадди вичин уьмуьрдин 57 йис бахшна.
1959-йисалай 1991-йисалди А.Магьсудов са шумуд кинода (“Тучи покидают небо”, “Горянка”, “Сказание о храбром Хочбаре”, “Тень завоевателя”, “Рай под тенью сабель”) жавабдар ролар тамамарай актер язни малум я.
Абдурашид Гьасановичан экуь къамат, адан пешекарвилин еке бажарагъ ва инсанвилин къени ерияр чи рикIелай садрани алатдач.
“Лезги газетдин” редакциядин коллективди рагьметлудан багърийриз, мукьва-кьилийриз, дериндай хажалат чIугуналди, башсагълугъвал гузва.
«Лезги газет»
