Республикадин “Мегьарамдхуьр-Ахцегь-Рутул” рехъ ремонт авун патал 300 миллион манат чара ийида. Идан гьакъиндай “Дагестанавтодор” ГКУ-дин регьбердин везифаяр вахтуналди тамамарзавай Ханмегьамед Рагьимова малумарна.

Ахцегь райондин участокда рекье къир цайидалай инихъ 25 йис алатнава. ЦIи лагьайтIа, яргъалди гуьзлемишай капитальный ремонт башламишда. 8-июндиз кьиле фейи гуьруьшдал  Х.Рагьимова малумарна хьи, автомобилрин рекьер цIийикIа туькIуьр хъувунин ва ремонт авунин программадал асаслу яз, 2021-2022-йисара Докъузпара райондилай эгечIна,  85 километрда (Калукрин къекъуьндал кьван) рехъ ремонт авун патал 300 миллион манат чара авунва.

12 километрдин рекье алай йисуз къир цада. Мукьвара аукционда гъалиб хьайиди малумарда.

«Лезги газет»