ТАСС-диз Москвадин прокуратурадин пресс-къуллугъди хабар гайивал, уьлкведин меркездин Преображенский райондин суддин къарардалди Дербент райондин администрациядин виликан кьил Мегьамед Желилов 6 йисуз дустагъ авуна. Судди ам 8,6 миллион манат пул къанунсуздаказ харж авунай тахсиркар яз гьисабна.
Уголовный делодин материалрай малум жезвайвал, 2016-йисуз М.Желилова райондин хсусиятда авай 6 гектардин майдандин чил, къанунсуз къараррин бинедаллаз, вичин чирхчиррин хсусиятдиз вугана. И чилер Зидьян-Къазмаяр хуьруьн мулкарал алай ва абур хуьруьн майишатдин макьсадра ишлемишзавайбурук акатзавай.
Къанунсуз гьерекатрин нетижада М.Желилова райондиз 8,6 миллион манатдин кьадарда аваз зарар гана.
* * *
РФ-дин Силисдин комитетдин РД-да авай Управленидин пресс-къуллугъди хабар гузвайвал, Дагъустандин Огни шегьердин администрациядин виликан кьил Зейдулла Гьашимован гьакъиндай уголовный дело къарагъарнава. Адал къуллугъдин рекьяй авай векилвилерин сергьятрилай элячIунай (превышение должностных полномочий) шак гъизва.
Силисдин органри гьисабзавайвал, 2019-йисуз З.Гьашимова, къанунриз акси экъечIна, вахтуналди производстводин макьсадра ишлемишун патал ООО-див аялрин бахчадин патав гвай 3672 кв.м. майдан авай дарамат ва 4375 кв.м. майдандин чилин участок вугана. Карханади и дараматда эцигунрин кIвалахра ишлемишзавай материалар гьазурзавай. Къанундал асаслу яз, аялрин бахчайрин патарив промышленностдин производстводин объектар хьана кIанзавач.
«Лезги газет»
