1-июндиз, аялар хуьдай Международный юкъуз, Дагъустандин гьар са пипIе суварин мярекатар кьиле фена. Идакай РД-дин Кьилин везифаяр вахтуналди тамамарзавай Сергей Меликова Инстаграмда вичин официальный чина кхьенва.
“Чна уьмуьрдин четин шартIара гьатнавайбур патал сувар тешкилун кьетIна: агьвал авачир хизанрай тир аялриз, къанун-къайда хуьдай органрин телеф хьанвай къуллугъчийрин рушаризни гадайриз, сагъламвал сергьятламиш хьанвай балайриз.Чаз абуруз уьмуьрдин шадвал ва кIанивал багъишиз, абур аял чIавалай расалмиш жезвай четинвилер са тIимил вахтунда хьайитIани рикIелай алудиз куьмек гуз кIан хьана.
И йикъа чи, чIехибурун, фикир акьалтзавай несилдин жигьетдай чи хиве еке жавабдарвал авайдал, жаван гражданинрин ихтиярар хуьнихъ гьикьван важиблувал аватIа, абурун жигьетдай къайгъударвал авунал, мадни важиблуди — абур рикIивай кIан хьунал желбзава. Къенин юкъуз республикада жаван дагъустанвияр тамамдаказ вилик фин патал шартIар тешкилунихъ элкъуьрнавай чIехи кIвалах кьиле тухузва: аялрин бахчаяр, мектебар, спортдин ва медениятдин объектар эцигзава.
Россиядин Президент Владимир Путинан къарардалди чи уьлкведа дидевал ва аялвал хуьн патал садрани тахьай хьтин серенжемар кьабулнава. Чун инлай кьулухъни чи аялар, абур гьар сад патал акьван герек тир къенивал, кIанивал ва сад-садан гъавурда акьадай гьалара чIехи жедайвал алахъда”, — къейдна региондин Кьили.
Къейд авун лазим я хьи, 1-июндиз Дагъустан Республикадин Гьукуматдин Председателдин везифаяр вахтуналди тамамарзавай Нуьсрет Омарова сагъламвилин мумкинвилер сергьятламиш хьанвай 3 аял тербияламишзавай Махачкъаладай тир Гьажиеврин хизандиз аялар хуьдай Международный югъ тебрикна. И юкъуз, Избербашдин аялрин 7-нумрадин кIвале тербия къачузвай балайриз сувар тебрикиз, РД-дин Гьукуматдин Председателдин Сад лагьай заместитель Батыр Эмеев ва Избербашдин кьил Мегьамед Исакьов фена. РД-дин Гьукуматдин Председателдин заместитель Муслим Телякавова лагьайтIа, Махачкъалада кардик квай РД-дин яшар тамам тахьанвай аялрин яшайишдинни реабилитациядин центрада сагъламвал мягькемарзавайбуруз аялар хуьдай Международный югъ тебрикна.
«Лезги газет»
