Терроризмдиз — ваъ!
Алатай гьафтеда меркезда, “Россия — зи тарих” тарихдин паркунин чIехи залда, “Терроризмдин идеологиядиз информациядин жигьетдай аксивал авуниз талукь месэлаяр: теория ва тежриба” лишандик кваз илимдинни тежрибадин конференция кьиле фена. Ам РД-дин информациядин ва печатдин министр Умаросман Гьажиева ачухна ва кьиле тухвана.
Мярекатда республикадин илимдин идарайрин пешекарри, СМИ-рин руководителри, жуьреба-жуьре изданийрин журналистри, къайдаяр хуьдай органрин, общественный организацийрин векилри, блогерри ва вузра кIелзавайбуру иштиракна.
Санлай къачурла, конференциядал терроризмдиз акси кIвалах тухуниз талукь къиметлу ва метлеблу ихтилатар авуна. Кьилди къачуртIа, Умаросман Гьажиева терроризмдин идеологиядиз акси кIвалах тухунал неинки къайдаяр хуьдай органар, информациядин, печатдин идараяр, гьакI диндин векиларни, гьа са вахтунда къецепатан уьлквейрин диндин вузра кIелзавай чи ватанэгьлиярни машгъул хьун лазим тирдакай лагьана. ГьикI хьи, хаталувал гьеле алатнавач. 2010-2015-йисара Сириядиз, Иракдиз дяведа иштиракиз Дагъустандай 2 агъзурдав агакьна жегьилар фена. Ахьтинбур мадни хьун мумкин я. Вилик пад кьун патал и важиблу кIвалахда жаванринни жегьилрин арада машгьур хьанвай социальный сетрикайни (гаджетрикай, пабликрикай, мессенджеррикай) менфят къачуна кIанда.
Эхиримжи йисара республикада террордин гьерекатрин ван-сес амач. Амма им террористрин дестеяр акьалтIнава лагьай чIал туш. Терроризмдин идеологри чпин кIвалахдани дегишвилер твазва. Эгер вад-цIуд йис идалай вилик абуру чпин лишандик 18 йисалай вине авайбур кутазвайтIа, къе школьникрин арада чпин чIуру таблигъат тухузва. Чи аялар абурун таъсирдик акат тавун патал сагълам къуватри санал кIвалахун важиблу я. И жигьетдай журналистриз куьмек жедайвал, къайдаяр хуьдай органрин къуллугъчийри чпи жегьилрин арада тухузвай оперативный профилактикадин кIвалахдин нетижайрикай малуматар гун герек я.
Мярекатдал “Дагъустан” РИА-дин регьбер М.Мегьамедов, “ИКЦ” ГБУ-дин директор М.Амиров, тIвар-ван авай политолог Х.Къурбанов, Дагъустандин илимдин центрадин тарихдин, археологиядин ва этнографиядин Институтдин социологиядин отделдин заведующий З.Абдулагатов, ДГУ-дин юридический факультетдин уголовный праводин ва криминологиядин кафедрадин доцент А.Асильдаров, “РСБС” ГБУ-дин директор, социолог Г.Малучиев ва масабурни рахана, абуру гьалариз анализ ва къиметлу теклифар гана.
Мярекатдин эхирдай РД-дин информациядин ва печатдин министр У. Гьажиева са жерге журналистрин ва общественникрин кIвалах грамотайралди къейдна.
Хийир Эмиров
