22-майдиз Кьасумхуьрел лезги халкьдин къагьриманвилин “Шарвили” эпосдин сувариз гьазурвилер акунин ва ам кьиле тухунин жигьетдай кардик квай тешкиллувилин комитетдин заседание кьиле фена. Идакай “Лезги газетдиз” Ахцегь райондин администрациядин пресс-къуллугъди хабар гана.
Мярекатдал рахайбуру республикадин дережада аваз кьиле тухузвай суварихъ халкьарин арада дуствал мягькемарунин, милли меденият вилик тухунин, руьгьдин ивирар хуьнин, акьалтзавай несилар ватанпересар яз чIехи авунин жигьетдай авай важиблувал къейдна.
Комитетдин членри, республикада коронавирусдихъ галаз алакъалу яз авай гьалар фикирда кьуна, алай йисуз суварин мярекатар гьар са районда кьилди тешкилдай къарар кьабулна. Абуру гьакIни, районра мярекатар тухудайла, коронавирусдин вилик пад кьунин патахъай Роспотребнадзорди, духтурри гузвай меслятрал амал авун теклифна.
«Лезги газет»
