Дагъустан Республикадин Кьилин везифаяр вахтуналди тамамарзавай Сергей Меликов, муниципалитетриз физ, анра авай гьаларихъ галаз таниш жезва. И сеферда ам республикадин кеферпатан зонада авай са жерге хуьрериз фена. 28-майдиз региондин регьбер Къизляр райондин агьалийрихъ галаз гуьруьшмиш хьана ва ада са жерге объектрал кьил чIугуна. Идан гьакъиндай «Лезги газетдиз» Дагъустандин Кьилин пресс-къуллугъди хабар гана.
Каспий гьуьлуьн къерехда балугъчийрин хуьр хьиз арадал атанвай Къизляр райондин Крайновкада Сергей Меликов “Туристско-рекреационный комплекс “Золотые Дюны” проект уьмуьрдиз кечирмишзавай гьалдихъ галаз таниш хьана. Хизанди ял ягъунин ва аялрин сагъламвал мягькемарунин къайгъуда аваз эцигиз гъиле кьур комплексдив махсус программадин бинедаллаз гатIуннай.
Проектдин сергьятра аваз 200 чка авай мугьманханадин комплекс, 35 кас патал мугьманханадин кьве гьавадин (VIP) комплекс, клуб, столовой, спортдинни сагъламвилин комплекс (адахъ аквапарк, аялрин, волейболдал ва теннисдал къугъвадай майданар), яшайишдин 6 коттедж ва машинар акъвазардай чка жеда.
Крайновкада С.Меликов хуьруьн агьалийрихъ галаз гуьруьшмиш хьана ва абурук секинсузвал кутазвай месэлайрин гьакъиндай (целди, фельдшервилинни акушервилин пункт медицинадин тадаракралди таъминарун) веревирдна. Хуьр целдини газдалди 2022-йисуз таъминарун фикирдиз къачунва.
Къизляр районда авайла, Сергей Меликова майдин вацра квахьай хва кьенваз жагъай Курамегьамедоврин хизандиз башсагълугъвал гана. Шоуменан тIвару-нихъ галай хуьряй тир 8 йиса авай Гьажимегьамед жагъурун патал къайдаяр хуьдай ва МЧС-дин органри, волонтерри, хуьруьнвийри пуд юкъуз алахъунар авунай.
“Къизляр” ООО ПП кархана республикадилай къецени машгьурди я. Ана ядигарар патал чукIулар акъудзава. Гьар йисуз карханадин коллективди 250 жуьредин 170 агъзурдав агакьна чукIулар гьазурзава. Продукциядин са пай къецепатан уьлквейризни рекье твазва.
Райондин Новокохановское хуьре Сергей Меликов къизил балугъар индустриальный къайдада туьретмишзавай алай аямдин комплексдизни фена. И карханадин генеральный директор Ильман Батаеван гафаралди, и важиблу проект инвестордин хсуси такьатралди ва гьакI государстводин куьмекдалдини кьилиз акъудзава. Адан сергьятра аваз производстводин са линия Астрахандин областдани кардик кутунва. Ана Дагъустанда авай комплексдиз хкун патал балугърин шарагар туьретмишзава. Алай вахтунда и карханада 16 кас патал кIвалахдин чкаяр тешкилнава. Гележегда абурун кьадар 50-дав агакьда.
Районда мугьманвиле авайла, Сергей Меликов Кардоновка ва са жерге къунши хуьрерин агьалийрихъ галазни гуьруьшмиш хьана. Сифтедай региондин Кьил хуьруьн школадиз фена ва ада кIватI хьанвай инсанрин тIалабунрихъ, теклифрихъ яб акална. Хуьре 2600 кас яшамиш жезва. Саки вири хуьрерин агьалийрик гьа са жуьредин месэлайри секинсузвал кутазва.
Бабаюрт районда Сергей Меликова Бабаюрт хуьре авай яшайишдин объектрал кьил чIугуна. Абурукай кьвед (330 чкадин аялрин бахча ва 1176 ученик патал школа) 1980-йисалай эцигзава. Объектрал алай гьал акурла, региондин Кьили РД-дин экономикадин ва вилик финин министерстводал, талукь маса ведомствойрал аялрин бахча республикадин инвестпрограммадин сергьятра аваз эцигуниз талукь документар гьазурун тапшурмишна.
Сергей Меликова лагьайвал, алай йисуз проектар туькIуьрун ва къведай йисуз эцигунрив эгечIун лазим я. Вири кIвалахарни виниз тир еридивди тамамарун герек я. Аялрин бахча герек вири шейэралдини тадаракламишда. Бабаюртда адаз, эцигиз гъиле кьуна, куьтягь тавунвай 600 кас гьакьдай культурадин кIвални акуна.
Бабаюрт райондин Геметюбе хуьре Сергей Меликов ацахьдай гьалда авай школадин дараматдизни килигна. Ам 1960-йисуз инсанар яшамиш хьун патал эцигнавай 8 квартирадикай ибарат дарамат тир. Къе школада 270 аялди пуд сменада кIелзава.
Алай вахтунда школадин цIийи дарамат эцигун патал чил чара авунва. Сергей Меликова цIийи дарамат эцигун патал герек тир проектдинни сметадин документар туькIуьрунин гьакъиндай малумарна: “Эгер цIи проект туькIуьрайтIа, 2023-йисуз цIийи школадин варар аялар патал ачух жеда”.
Республикадин Кеферпатан районра мугьманвиле авайла, Сергей Меликов Бабаюрт районда авай Рутул райондин малдарар, хипехъанар яшамиш жезвай къишлахрални фена. И райондин Львовский хуьре ам ацахьдай гьалда авай школадизни тамашна. Инани пуд сменада 176 школьникди кIелзава. Дарамат 1958-йисуз эцигнавайди я. И хуьрени республикадин инвестиционный программадин сергьятра аваз школадин цIийи дарамат эцигда.
«Лезги газет»
