Сердер Ширинбегович Мегьамедов чаз мукьувай чидай лап хъсан муаллимрикай, тешкилатчийрикай, дустарикайни сад тир. Хайи чIалал, газетдал, милли культу-радал гзаф рикI алайвиляй ам чаз, журналистриз, мукьва авурдал шак алач. Вичиз са гьихьтин ятIа дарихвал ва я шадвал хьайивалди, ам чи патав редакциядиз акъатдай, чи хейлин суаларни рикIелай алудна хьиз хъфидай.
И экуь дуьньядал ам 74 йисуз яшамиш хьана. Идакайни 35 йис халкьдин образованидин хилез бахшна. 15 йисуз ам чи меркезда лап четинбурукай сад тир 16-нумрадин юкьван школадин кьиле акъвазна. Кьулухъ галамай, усал шартIарин чка “перестройкадин” алаш-булашдинни тарашунрин вахтунда неинки хвена, хейлин рекьерай гьакI виликдини чIугуна.
Идан гьакъиндай Сердер Ширинбеговичаз Махачкъаладин образованидин управленидин а чIаван начальник М.Г.Мегьамедован къул алаз ганвай характеристикадини шагьидвалзава: “С.Ш.Мегьамедов кьилевай школадин коллективдихъ тайин тир агалкьунар хьанва. Сад лагьайди, муаллимар санал агудзавай, са метлебдихъ чIугвазвай, руьгьламишзавай алакъаяр арадал атанва.
Кьвед лагьайди, ина аялри чирвилерин ва тербиядин рекьяй къалурзавай дережаяр дурумлубур, чпелай чешне къачузвайбур я. Гьар йисуз лап еке десте аялри гьам шегьердин, гьам республикадин олимпиадайра агалкьунар къалурзава. Мадни кьетIенди, ина аялрин арада яргъал йисара са жуьрединни тахсиркарвилер хьанач…”
Себеб сад я, и карни гьа характеристикада къалурнава: “С.Ш.Мегьамедова вичин кIвалахда сабурлувал, зегьметдихъай кичIе туширвал къалурунихъ галаз сад хьиз, ам гафунизни, буржидизни, къуллугъдизни михьи я. Вичивай хьиз, коллективдивайни сад хьиз истемишзава…”
Ихьтин гафарилай гуьгъуьниз мад вуч лугьуз жеда?
Педагогвилин бегьерлу зегьмет Сердер Ширинбеговичаз “РД-дин халкьдин образованидин отличник”, “РД-дин лайихлу муаллим”, “РФ-дин умуми образованидин гьуьрметлу работник” лагьай тIварар гуналди, маса шабагьралди, тарифдин чараралди къейднава.
Сердер Ширинбеговичав агакьай ирс екеди я. Гьа ирсиниз вафалувили ам халкьдин вилик гьуьрметри ва лайихлувилери хкажни авуна. Ам Ахцегьа вич асилдай чIехи муаллим тир Ширинбеганни адан кайвани, цIуд аялдин диде хьайи (Игит дидедин) Икьлимаядин хизанда чIехи хьана. Аял чIаварилай ада илимдихъни чирвилерихъ еримишна. Амма сифте камар Дагъустандин радиода ва Ахцегь райондин Хинерин хуьре (Къизил дереда) мяденра кIвалахунихъ галаз алакъалу авуна. А чIаван адет тирвал, Сердера вич производствода вуж ятIа чирна, ахпа вуздиз гьахьна. ДГУ-дин филологиядин факультетда кIелна, Хив районда муаллимвиле зегьмет чIугуна, ахпа Махачкъаладиз атана…
Шегьердин чIехи школадиз регьбервал гуни Сердер Ширинбегович аялриз хьиз, абурун диде-бубайриз, шегьердин жемятдин векилризни машгьурна. Гьавиляй ам галаз-галаз са шумуд сеферда шегьердин Советский райондин, ахпа Махачкъала шегьердинни собранийриз депутатвиле хкяна. Сердер Ширинбеговича, школада хьиз, вичи кIвалахзавай райондани къулайвилер, михьивилер, къайда, низам хуьн патал вири мумкинвилер жагъуриз хьана. И карди ам мадни машгьурна. Хайи райондин агьалийриз ам гьатта чпин райадминистрациядин кьилиз хутахиз кIанзавай. Яни ам, шегьердиз хьиз, райондизни вафалу тир, анин саки вири важиблу мярекатрик вичин пай кутазвай…
Сердер Ширинбеговича чIехи ва вичелай чешне къачуниз лайихлу хизанни арадал гъана: 2 хвани руш, хтулар чIехи авуна… Бубавилин, архавилин везифаяр намуслувилелди кьилиз акъудна: кIвал-югъ кутуна, багъ-сални битмишарна, аялризни хъсан тербия гана…
Чи газетдин редакцияда хьиз, шегьердани, Ахцегьани, Хивдани, масанрани адахъ гьакьван хатурлу ва вафалу дустар гзаф авай. Кьисметди, гьайиф, ам фад, рикIик гзаф крар кумаз къакъудна.
Вич сагъсуз тирди чизвайлани, Сердер Ширинбеговича бушвалдачир, мугьманвилериз фидай, мугьманар вичини хушдиз кьабулдай. Газетдин редакциядихъайни кам галуднач. Зенгералдини чаз суварар, агалкьунар тебрикдай, газет кхьиз куьмекар гун тешкилдай…
И йикъара адан 75 йис тамам жезва. И вакъиа, вич галачтIани, адан хизанди, ярар-дустари къейдзава, хъсан инсан, чIехи муаллим ва тешкилатчи рикIел хуьзва. Бубадин ирс веледри давамарзава…
Мердали Жалилов
