Чи ватанэгьлияр – гьар сана
Экуьнахъ фад къарагъиз, сифтедай 2-3 километрдин, ахпа 5 километрдин мензил атIудай гъвечIи Салмана. Бубадин гуьзчивилик кваз гъвечIи чIавалай кIубан ва зиринг уьмуьр кьиле тухуз вердиш хьана ам. Къе пешекар футболист хьанвай Салмана вичин сифтегьан тренер буба Камран Атлуханов яз гьисабзава.
Салман Атлуханов 1994-йисан 12-октябрдиз КцIар райондин Лакарин хуьре дидедиз хьана. Жегьил гада 7-8 километрдин мензил авай КцIариз чукуриз-чукуриз финни ийидай, элкъвена хквенни. Юкьван мектебда ада лап хъсан къиметралди кIелна. Амма хуьре футболдал къугъвадай, алакьунарни викIегьвал къалурдай ва мадни вилик фидай мумкинвилер авачир. Сифтедай Салман райондин футболдин “Шагьдагъ” клубдин гъвечIи футболистрикай ибарат командадик экечIна.
Гададин зирингвал, зверунин йигинвал акурла, бубади, Камрана, вичин велед футболдал рикIивай машгъулардайвал хьана. Футболдин рекьяй мадни вилик фин патал ам гегьенш майданриз экъечIна кIанзавай, и мумкинвални бубадихъ авачир.
Вилик эцигай макьсад пуьрчуькьардайбурукай тушир Камран Атлуханова, Бакудиз куьч хьана, ана кIвал кирида кьуна, эцигунрин рекье устIар яз зегьмет чIугваз башламишна. Са йис арадай фейила, бубади футболдал кьару Салман Бакудиз хкана ва ина ам “Гележегдин гъед” тIвар алай акьалтзавай футболистрин командадик кутуна.
Футбол къугъунилай гъейри, Бакудин юкьван мектебдани тайинар хъувуна, кIелун давамарна. 2013-2014-йисара — Азербайжандин премьер-лигада “Локомотив” ФК-да къугъвана, 2014-2016-йисара — “Баку” ФК-да.
2016-йисуз ам Туьркиядиз атана, ина футболдал машгъул хьун давамарна. 2016-2017-йисара футболдин “Кушадасыспор”, 2017-2018-йисара — “Мерзифонспор”, 2018-2019-йисара “Сакарияспор” 2019-2020-йисара “Ешиловаспор” клубрихъ галаз икьрарар кутIунна, къугъвана. Салман къугъвай вад клубдикай пуд клуб чемпионвилин дережадиз акъатна. Эхиримжи сезонда (2020-2021) 24 къугъуна ада акси командадин варариз 6 туп яна. Им чи ватанэгьлидин алакьунар успатзавай хъсан делил я.
Алай вахтунда ам Туьркиядин “Fk 1864 Spor” футболдин клубдин спортсмен я. ЦIинин йисузни ада футбол къугъунай 2 ва 3-чкаяр кьуна.
“Азербайжандинни Туьркиядин футболда еке тафават ава. Туьркиядин футбол вини дережадинди, анин футболистарни къуватлу я, хъсандиз къугъвазва. Гьавиляй сифте йисуз заз са тIимил четин хьана”, — лугьузва Салман Атлуханова.
Алай вахтунда ада вичин зирингвал мадни артухарзава, вахт-вахтунда вердишвилер къачунин къугъунра иштиракзава, са гафуналди, вичин уьмуьр датIана спортдихъ галаз алакъалу авунва. Ада ихтилатзавайвал, рикIин мурадар кьилиз акъатун патал инсанди а рекье гзаф зегьмет чIугун ва, кьилинди, жувахъ инанмиш хьун герек я.
Къуй зирек Салманахъ футболдин алемда еке агалкьунар хьурай!
К.Ферзалиев
