ЦIийи ктабар

И мукьвара Дербентдин “Типогра­фия-М” ООО-да Ахцегьай тир зегьметдин ветеран Нариман Абдулович Гьа­жи­еван пуд лагьай ктаб — “Вехи судьбы” — чапдай акъатна. 2017-йисуз адан къелемдикай “Уьмуьрдин нехишар” (“Узоры жизни”), 2018-йисуз лагьайтIа, гьа и чапханада, “РикIел хкунар ва хиялар” (“Воспоминания и думы”) кьил алаз Н.А.Гьажиеван 2-ктаб чапдай акъатнай.

Райондин культурадин кIвале адан презентацияни (раиж авун) кьиле фена. КIелзавайбуру ам хушдиз кьабулна. Ин­гье гила 3-ктабдизни дуьнья акуна.

Кьве гаф автордикай: Н.А.Гьажиев 1937-йисан 26-февралдиз Докъузпара райондин Усугъчай хуьре къуллугъчидин хизанда дидедиз хьана. Адан аял йи­сар Ватандин ЧIехи дяведин залан девирдал ацалтна. Буба фронтда женге­ра авай. 1954-йисуз Усугъчайдин юкьван­ школа куьтягьайдалай кьулухъ гьар жуь­ре йиса­ра ДГУ-да, РГУ-да, ВПШ-да (Дондал алай Ростов) кIелна. Филолог тир ада муаллимвиле, райондин “ЦIийи дуьнья” газетдин редакцияда, партийный ва советрин органра кIвалахна.  Са шу­муд сеферда райсоветдин депутатвиле хкянай.

Н.А.Гьажиев 1967-йисалай СССР-дин журналистрин Союздин член я. Адан публицистикадин эсерар “Дагъустандин правда”, “Лезги газет”, “ЦIийи дуьнья” газетра, “Советрин Дагъустан”, “Дагъустандин дишегьли”, “Самур” журналра чапзава. Нариман Абдулович “Зегьметдин ветеран” медалдин, ВПШ-дин гьуьрметдин грамотадин сагьиб я. Адан тIвар ВПШ-дин Баркалладин ктабда гьатнава.

ЦIийи ктабда гьатнавай саки вири материалар гьар жуьре йисара “ЦIийи дуьнья” газетдин чинра чап авурбур я. Абурук автордал уьмуьрда расалмиш хьайи гьар жуьре вакъиайриз талукь ри­кIел хкунар, политикадин месэлайриз та­лукь веревирдер ва масабурни ква. Ктабдин са кьадар чинар хизандин архивдай къачунвай гьар жуьре шикилралди безетмишнава. Ктаб сифте гафуникай ва 4 кьиликай ибарат я.

Инанмишвилелди лугьуз жеда хьи, На­риман Гьажиеван и ктабни, сифтебур хьиз,  гьар са касдин фикир вичел желб­дайди хьанва. Ктабдин тираж анжах 50 экземпляр хьуни, гьелбетда, гьайиф чIуг­­ваз тазва. Имни гъавурда акьадай кар я. ГьикI лагьайтIа, ктабар чапдай акъу­­дун кьадарсуз багьаз акъваззава. Райондин руководстводивай и мурадар патал яратмишдай интеллигенциядиз са тIимил хьайитIани пулдин такьатар чара ийиз хьанайтIа, хъсан тир.

За жуван, райондин “ЦIийи дуьнья” газетдин редакциядин къуллугъчийрин, гьакI кIелзавайбурун патай Нариман Аб­дуловичаз цIийи ктаб мубаракзава.

Нариман  МАМЕДОВ,

журналист