И йикъара Белоруссиядин кьуршахар кьунин федерациядин регьбервиле  вичин ери-бине Сулейман-Стальский рай­ондин Кьасумхуьрелай тир  Алим  Сели­мов  тайинарнава. Чна адаз жавабдар къуллугъдал тайинарун рикIин сидкьидай тебрикзава, чи мурад ам мадни кьакьан кукIуш­риз хкаж хьун я.

Грекринни римлуйрин жуьреда кьуршахар кьунай дуьньядин кьве сеферда чемпион, “Динамо-Минск” футболдин клубдин виликан гендиректор тир ам Бе­лоруссияда­ яшамиш жез яргъал йисар я. И уьлкведин патай ада международный акъажунра вичин устадвал къалурна, спортдин лайихлу­­ мастервилин тIвар къазанмишна. Чи ва­тан­дашдин кандидатура теклифайди Белоруссиядин спортдин ва туризмдин минис­трдин заместитель А.Барауля я. “Алим — кьур­шахар кьунин спортдин гъавурда авай кас, федерациядизни ам вилик тухун патал гьа ихьтин цIийи къуват герек я”, — къейдна ада.

_____________________________________________

Грекринни римлуйрин жуьреда кьуршахар кьун

И йикъара Кеферпатан Македониядин меркез Скопье шегьердай агакьай шад ха­барри чи руьгь хкажна. ИкI, 23 йисал къведалди яшда авай спортсменрин арада грекринни римлуйрин жуьреда кьуршахар кьунай Европадин кIвенкIвечивал патал кьиле фейи акъажунра вичин ери-бине Ах­цегьай тир  Анвар  Аллагьярова  60 кг — дин заланвал авайбурун арада къизилдин медаль къазанмишна. Финалда адаз И.Курочкин 9:0 гьисабдалди кумукьна.

Къейд авун лазим я хьи, А.Аллагьяро­ва кIвенкIвечивал патал акъажунра вичин къаршидиз экъечIай са спортсмендизни са баллни къазанмишдай мумкинвал ганач. Ада вири санлай кьиле тухвай бягьсер 25:0 гьисабдалди, кьве бягьсни вахт куьтягь же­далди акьалтIарна.

А.Аллагьярован агалкьунрикай чна идалай виликни муштулухар гайиди я. РикIел хкин: 2019-йисан июлдиз Ис­па­ния­дин Понтеведра шегьерда кьиле фейи Европадин кIвенкIвечивал патал акъа­жун­ра ­А.Аллагьяров гимишдин медалдиз лайихлу хьанай. Гьа йисуз Эстониядин меркезда хьайи дуьньядин кIвен­кIвечивал патал акъа­жунра, (55 кг-дин заланвал авайбурун арада) инанмишвилелди гъалиб хьуналди,  Ан­вар Аллагьярова къизилдин медаль къазанмишнай.  2020-йисуз Владимир шегьер­да кьиле фейи Россиядин чемпионатда (21 йисал къведалди яшда авайбурун арада) чи ватандашди 1-чка кьунай.

_____________________________________________

Азаддаказ кьуршахар кьун

Скопье шегьерда Европадин кIвен­кIве­чивал патал 23 йисал къведалди яшда авай  спортсменрин арада азаддаказ ­кьуршахар кьунайни акъажунар кьиле фена.

Чаз хабар хьайивал, ана иштиракай чи мад са ватандашди — алай вахтунда Азербайжандин хкянавай командадик кваз вичин устадвал къалурзавай   Жабраил  Гьажиевани  (70 кг-дин заланвал авайбурун арада) къизилдин медаль къазанмишна. Финалда адахъ галаз бягьсиниз Николай Грахмез (Молдова) экъечIнавай, бягьс 5:5 гьи­сабдалди акьалтIна. Чи ватанэгьлидин бягьсерин еридиз, устадвилиз жюриди ви­низ­ тир къимет гун мадни шад жедай кIва­лах я.

_____________________________________________

Дзюдо

Алатай гьафтедин ял ядай йикъара Моск­вадин областдин Зеленоград шегьерда япариз зайифдаказ ван къвезвай жаван спортсменрин арада дзюдодай Россиядин чемпионат кьиле фена. Ана уьлкведин 30-дав агакьна регионрай тир 120-далай виниз спортсменри иштиракна.

РД-дин физический культурадин ва спортдин министерстводин пресс-къуллугъди хабар гузвайвал, и акъажунра чи республикадин хкянавай командадик кваз иштиракай спортсменри къизилдин — 3, гимишдин — 3 ва буьруьнждин 5 медаль къазанмишна. Идалди чи республикадин хкянавай команда умуми зачётда 2-чкадиз лайихлу хьана.

Шадвилелди мадни а кардикай хабар гуз кIанзава хьи, Россиядин чемпионвилин тIварцIиз лайихлу хьайибурукай кьве спортсмен — Руслан  Аскеров  (66 кг) ва Назим  Саидов  (60 кг) чи ватанэгьлияр я.

Чи мурад лезги кьегьал рухвайрихъ еке агалкьунар, абур спортдин мадни кьакьан кукIушриз хкаж хьун я.

Рагнеда  рамалданова