И йикъара Нижний Новгородда авай чи ватанэгьлийри, кьиле и шегьерда кардик квай Дагъустандин халкьарин милли медениятдин центрадин председатель Алимегьамед Магьсубов аваз, Россиядин гьукуматдин деятель Загьир Сабирович Арухов рикIел хкуниз бахшнавай мярекат кьиле тухвана. Ана дагъустанви машгьур спортсменри, общественный деятелри, карчийри иштиракна.
РД-дин милли сиясатдин, динрин крарин ва къецепатан алакъайрин рекьяй министр хьайи Загьир Арухов 2005-йисан 20-майдиз террористрин чиркин гъилери телефна.
З.Арухов неинки республикада, гьакI адалай къецени алакьунар авай регьбер ва сиясатчи хьиз машгьур тир. Ам Дагъларин уьлкведин халкьарин садвилиз кьецI ва Россиядин мулкара экстремизмдин идеологиядиз рехъ гуз алахъзавайбуруз ви-кIегьвилелди акси экъечIна.
1999-йисуз Загьир Арухован агалкьунар “Ватандин вилик лайихлувилерай” II дережадин ордендин медалдалди къейднай.
“Санал кIватI хьун ва машгьур ксар рикIел хкун Нижний Новгородда яшамиш жезвай дагъустанвийрин адетдиз элкъвенвай кар я. Загьир Сабировичаз къецепатан са шумуд чIал чидай: араб, ингилис, немс. Ахьтин ксар чна гьамиша рикIера хуьзва”, — лагьана Алимегьамед Магьсубова.
Загьир Арухов хьтин чIехи ватанпересар, кьетIен инсанар, абурун крар рикIел хуьн ва несилрал малуматар агакьарун важиблу кар я.
Лезги Фетгьуьллагь
