Алатай гьафтедин ял ядай йикъара меркезда, “Ак-Гёль” вирин къерехда авай багъда, Дагъустандин Кьил Рамазан Абдулатипован меслятдалди СКФО-да сад лагьай сефер яз тешкилнавай флористикадин фестиваль кьиле фена. Ам тешкилунин карда РД-дин Гьукуматди, Махачкъала шегьердин ва Ленинский райондин администрацийри, цуькверин бизнесдал машгъул ксари куьмекна: инаг, тамун накьв вегьена, хейлин тарар, кул-кусар, цуьквер цана, газон экIяна, гуьрчегдаказ туькIуьрнавай.
Фестивалдин сергьятра аваз Москвадай, Чечен Республикадай, Ставропольский крайдай атанвай мугьманрин иштираквални аваз флористикадай, ландшафтрин дизайндай кIвалахрин конкурс, къацу кул-кусар кIалубра аваз тукIуьрунай (топиарный стрижка) мастер-классар, аялар патал конкурсарни кьиле тухвана. Фестивалдин иштиракчийриз Америкадин Сиэтл шегьерда флористикадай кьиле фидай дуьньядин чемпионатда иштиракун патал гьазурнавай кIвалахарни аквадай мумкинвал авай.
Дугъриданни, кьве югъни агъзурралди меркезвиярни мугьманар патал халис сувариз элкъвена, абуруз мярекатдин тешкилатчийри ина цуькверин зурба алемдиз-и кьил а кьил авачир гуьрчегвилиз-тамашдай, а легьзеяр мадни яргъалди рикIел аламукьдайвал шикилар ядай, лентиниз къачудай мумкинвилер яратмишнавай. Мярекатдиз атанвай ксариз багъда арадал гъанвай Ицаринский башня, таза цуькверин цал ва маса арт-объектар иллаки хуш тир.
Фестиваль ачухуниз талукьарнавай шад мярекатдал рахадайла. Махачкъаладин мэр Муса Мусаева къейд авурвал, багъ мукьвара мадни абад ва гуьрчег жеда: ина арадал гъиз алакьнавай крар чIехи проектдин са пай я, 1-сентябрдалди кIвалахар вири куьтягьда. Гележегда и багъда “ГъвечIи Дагъустан” багъ-музей ва набататрин багъ-музей арадал гъунни фикирдик ква.
Рагнеда Рамалданова
