Гафарин алемдай

И йикъара за “Лезги газетдин” 18-нумрадай Самур хуь­ряй тир гьуьрметлу М.Исмаилован “Гарданбаз яни, гар­данбуш?” макъала кIелна. Макъаладин эхирдай авторди газет кIелзавайбурувай чпин фикирар кхьин тIа­лаб­навай. Гьавиляй инал заз жуван фикирни лугьуз кIан­зава.

Гьуьрметлу Исмаилов, куьне макъалада кхьенва: “Чи чIала -лу, — вал, -суз, -ган, -бан, -чи, -хъан хьтин суффиксрин куьмекдалди гзаф гафар арадал къвезва. Амма -баз суффикс квай гафарин кьадар лап тIи­мил я. Месела, уюнбаз, гьиллебаз, къумарбаз”. Инал за квез ихьтин кьве суал гун. Квез -буш суффикс я лугьуз кIанзавани? Ам акал хьанвай гафар лезги чIала мад гьикьван ава?

Зи кьатIунралди, я гарданбазни, я гарданбушни дуьз жезвач. Эгер чун гьахьтин вечрекай рахазватIа, чна кьве гафуналди лугьун: гардан кьецIил верч.

Яни куьне ихтилат куднавай  гарданбаз ва гарданбуш гафарин чкадал “гардан кьецIил” лагьайтIа, аялни кваз дуьз гъавурда акьада, лезги чIални вичин чкадал аламукьда. АкI вучиз я лагьайтIа, пек, чIар, цIакул алачир чкадиз “кьецIил чка” лугьуда.

Т.Темирханов,

Гъепцегьрин хуьр