Чи ватанэгьлияр — гьар сана
Уьлкведин меркездин машгьур клиникайра, азарханайра ва маса медидарайра агалкьунралди кIва-лахзавай, отделенийриз, центрайриз регьбервал гузвай нуфузлу духтуррин жергейра лезгиярни гзаф ава. Ахьтинбурукай яз, чавай дамахдивди Максим Музафарович Абасован тIварни кьаз жеда. Ам рикIинни дамаррин азарар авайбур операция ийизвай хъсан хирург, флеболог, медицинадин илимрин кандидат, ультразвуковой диагностикадин духтур-пешекар, здравоохраненидин тешкилатчи я.
Максим Абасов 1978-йисан 3-июлдиз Сулейман-Стальский райондин КIварчагърин хуьре алимдин хизанда дидедиз хьана. Адан буба Музафар Мирзеагъаевич экологиядин ва тIебиат ишлемишунин международный академиядин академик, биологиядин илимрин доктор, хуьруьн майишатдин илимрин кандидат, РД-дин хуьруьн майишатдин лайихлу къуллугъчи я, диде Райгьанат Зейдулаевна — агроном.
1995-йисуз Махачкъаладин 42-нумрадин мектеб тафаватлудаказ куьтягьна, Максим Дагъустандин госмедакадемиядик экечIна. Анаг 2001-йисуз акьалтIарна, гуьгъуьнлай Москвада РАМН-дин А.Н.Бакулеван тIварцIихъ галай рикIинни дамаррин хирургиядин илимдин центрада ординатурада вичин пешекарвал, чирвилер мадни артухарна. Кьве йисуз ординатурада кIелна куьтягьайдалай кьулухъ ана аспирантурадикни (2003-2006-йисара) экечIна.
2006-йисуз чи ватанэгьлиди “Экспериментально-клиническая оценка “Биоклея-ЛАБ” в сердечно-сосудистой хирургии” темадай агалкьунралди медицинадин илимрин кандидатвилин диссертация хвена. Илимдин агалкьунар ада здравоохраненидин тежрибадин кIвалахдани кардик кутуна. Медицинадин илимдин рекье жегьил алимдихъ дамах ийиз жедай хьтин кIвалахар-нетижаяр хьанва: ам илимдин 20 макъаладин (абурукай бязибур уьлкведин печатдин машгьур такьатриз акъатнава) автор, “Сагълам ва яргъи уьмуьр давамарунин рекьяй 100 меслят” ктабдин авторрикай сад я.
РикIинни дамаррин хирургвиле кIвалахунин рекьяй адахъ 20-далайни гзаф йисарин тежриба ава. Максим Музафаровича зегьметдин рехъ рикIинни дамаррин хирургиядин рекьяй уьлкведин кьилин идара тир РАМН-дин А.Н.Бакулеван тIварцIихъ галай ССХ-дин НЦ-да (Национальный медицинский центр сердечно-сосудистой хирургии) башламишна. Ина ада РФ-дин кьилин кардиохирург Л.А.Бокериядихъ галаз санал рикIин операцияр авунин кIвалахра иштиракна.
Эхиримжи са шумуд йисуз ада дяведин ветеранриз талукь Москвадин 1-нумрадин госпиталда дамаррин хирургиядин отделенида зегьмет чIугуна. Духтурди ихтилатзавайвал, госпиталда 80-далай 100 йисал кьван яшар хьанвай дяведин ветеранар, далу пата зегьмет чIугурбур, Ленинграддин гьалкъада хьайибур сагъарна. 2015-2018-йисара чи ватанэгьли винидихъ тIвар кьунвай ветеранрин госпиталдин дамаррин хирургиядин отделенидин кьиле акъвазна. Вичин пешедин рекьяй адавай вири жуьредин операцияр кьилиз акъудиз жезва; тежрибада ада 1000-далайни гзаф операцияр тамамарнава.
ДатIана пешекарвилин дережа хкажзавайвиляй адахъ хъсан агалкьунарни жезва. Уьлкведин, вири халкьарин дережайра кьиле физвай пешедиз талукь конференцийра, съездра ада мукьвал-мукьвал иштиракзава.
Ам вири жигьетрай алай девирдихъ галаз кам-камуна аваз физвай савадлу, тежрибалу ва галатун тийижиз инсанрин сагъламвилин къуллугъда акъвазнавай пешекар я. Идан гьакъиндай адан тIварцIихъ интернетдин чешмейра инсанри кхьизвай тарифдин, алхишрин, разивилин келимайри шагьидвалзава.
Вичин чирвилер, меслятар гзаф кьадар инсанрив агакьарун патал ватанэгьлиди ютуб-канал кардик кутунва, тамашачийрин суалриз ачух эфирда, гьакIни махсус къейдера жавабар гузва. Адан каналдикай менфят къачуз кIанзавайбурувай ютубда “Максим Абасов, флеболог, Москва” кхьена, жагъуриз жеда. Ютуб-каналдани адаз вишералди ватандашри хъсан гафар кхьенва, абуру духтурдин пешекарвал, инсанвал къейдзава.
Чаз Максим духтурдихъ кIвалахда мадни еке агалкьунар хьана кIанзава.
К.Ферзалиев
