Китайдин Чунцин, вичин мулкарин кьадардал гьалтайла, дуьньядин винел виридалайни чIехи шегьер я. Ина яшамиш жезвай агьалийрин кьадар 30 миллиондив агакьзава.
Шегьер Янцзы вацIун вини кьил авай чкайра экIя хьанва. Ам элкъвена са акьван чIехи тушир дагълари кьунва. Чунцинда гьавадин чимивал 18 градусдилай агъуз аватзавач, марфар гзаф къвада.
Тарихдиз вил вегьейла малум жезвайвал, Чунцин Китайдин медениятдинни тарихдин метлеб авай къадим шегьеррикай сад яз гьисабзава. Палеолитдин девирра ина сифтегьан инсанар пайда хьана. Гилан шегьер алай мулкарал са мус ятIани Ба пачагьлугъдин меркез экIя хьанвай. XIV асирдилай гатIунна, Чунцин дуьньяда улакьар сад-садахъ галаз алакъалу ийизвай кар алай чка яз гьисабзавай. Инай агъзурралди карванар физвай.
Шегьердиз мукьва дагълара инсанрин сагъламвал патал гзаф хийирлу дармандин чешмеяр ава. Чунцин туристар патални итижлу чка я: тамарин кIачIичIлухри, дагълара авай яйлахри, чарчарри, кIамари, дерейри, вичел 600 километр алай вири чпел фикир желбзава. Идалай гъейри, Китайдин къадим пIипI тарихдин гуьмбетралдини девлетлу я.
Гьазурайди — Агьмед Магьмудов
