И йикъара республикада жегьил хизанриз яшайишдин кIвалер эцигунин программадин сергьятра аваз РД-дин “Дирекция МЖСП” ГБУ-дин директор Мурад Качукаев ва адан заместитель Ибрагьим Мегьамедов Ахцегь райадминистрациядин залда жегьил хизанрин векилрихъ галаз гуьруьшмиш хьана. Мярекат, мугьманар тебрикунин гаф рахуналди, Ахцегь муниципалитетда эцигунрин сад тир Управленидин (МБУ “УСЕЗ”) начальник Алихан Ибрагьимова ачухна ва кьиле тухвана.
Мурад Руслановича къейд авурвал, жегьил хизанар яшайишдин къулай кIвалералди таъминарунин рекьяй РФ-дин махсус программа Дагъустанда кардик кваз 10 йисалайни гзаф я. Амма вири и вахтунда программади (пропискадин ва бязи маса себебарни аваз) республикадин анжах шегьерра кIвалахзавай. Гила дагълух районрай тир жегьил хизанризни и программадикай менфят къачудай мумкинвал хьанва. Месэладив Ахцегь райондилай эгечIнава. ЦIи Дагъустанда 540 жегьил хизан яшайишдин кIвалералди таъминарун планламишнава.
Месэладин асул метлеб вуч я?
Жегьил хизандиз са жуьре куьмек хьун патал, кIвалин къиметдин сифте взнос яз, 30% муьштериди гузва ва 45 процентдив агакьна пул адав гьукуматди, субсидия яз, вахкузва. Амукьзавай пул, вад йисаз пайна, гьар вацра кIвалин иесиди вахкуда. Керпичрикай ерилу кIвалер Махачкъалада, Кировский районда, Ак-Гёл вирин патав (кв. метр — 35 агъзур манат) ва Дербентда Ленинан куьчеда (кв. метр — 30 агъзур манат) эцигзава. КIвал 2-3 йисан къене бегьемарна, рак-пенжер, чимивал, сувагъар яна, электропроводка аваз вахкуда. Хъсандиз гъавурда гьатун патал ихьтин мисал гъин. Жегьил хизанди Махачкъалада кьве кIваликай ибарат квартирадин (66,7 м.) сифте взнос (30%) 650-750 агъзур манат гуда, 906 агъзур манат адаз гьукуматди, субсидияр яз, ва амай пай кIвалин иесиди 5 йиса гьар вацра 10-12 агъзур манат вахкуда. Эхирки 2 миллионни 335 агъзур манатдин къимет авай кIвалер жегьил хизандиз 1 миллионни 456 агъзур манатдай акъвазда. Пул къуватдай аватуни (инфляция) и къиметриз таъсирдач.
КIвалерин игьтияж авай жегьил хизанривай (яни 36 йис тахьанвай) талукь тир документар Ахцегь райадминистрацияда УСЕЗ-дин идарадиз вугуз жеда. Алава вири малуматар анай ва я, 61-06-71 нумрадиз зенгна, МЖСП-дин дирекциядай чириз жеда.
Дашдемир Шерифалиев
