Дагъустанда яшамиш жезвай Ватандин ЧIехи дяведин ветеранриз алай йисан июндилай гьар вацра 20 агъзур манат пул гудайвал я. Идакай 18-майдиз Махачкъалада кьиле фейи республикадин терроризмдиз акси комиссиядин ва Оперштабдин саналди кьиле фейи заседанидал РД-дин Кьилин везифаяр вахтуналди тамамарзавай Сергей Меликова хабар гана. РикIел хкин, виликдай ветеранриз гьар вацра 2 агъзур манат пул гузвай.
“Вучиз Дагъустанда икьван чIавалди гзаф аялар авай, набуд аялар чIехи жезвай хизанрив бес кьадар куьмек агакьзавач, вучиз алай йисан майдалди ветеранриз гьар вацра 2 агъзур манат пул гузвай? Гьукуматдин Председателди ветеранриз гузвай пулдин кьадар артухарун теклифна. За адан тереф хуьзва ва и йисан июндилай ветеранриз гьар вацра 20 агъзур манат пул чара авунин тапшуругъ ганва”, — лагьана Сергей Меликова заседанидал.
«Лезги газет»
