Дагъустанда образованидин идараяр терроризмдин гьерекатрикай хуьнал гуьзчивал тухудай са шумуд ведомстводин пешекаррикай ибарат махсус десте арадал гъанва. Саласа юкъуз РД-дин Кьилин везифаяр вахтуналди тамамарзавай Сергей Меликован регьбервилик кваз республикадин терроризмдиз акси комиссиядин ва Оперштабдин саналди тешкилай заседанидал хабар гайивал, и дестедик МВД-дин, Росгвардиядин, образованидин ва илимдин, физический культурадин ва спортдин, жегьилрин крарин рекьяй, милли сиясатдин ва динрин крарин рекьяй министерствойрин векилар, депутатар акатнава.
РД-дин Кьилин ва Гьукуматдин Администрациядин патай дестедиз вице-премьер Рамазан Жафарова регьбервал гуда.
Лагьана кIанда, ихьтин десте арадал гъунин теклиф Дагъустанда авай Росгвардиядин управленидин начальник Мегьамед Баачилова гана.
Сергей Меликова къейд авурвал, мукьвара Казандин мектебда арадал атай хьтин мусибатдин дуьшуьшар эхиримжи йисара уьлкведа мадни хьанва. Ада 2018-йисуз Керчда, алай йисан мартдин вацра Подмосковьеда хьайи дуьшуьшар рикIел хкана. “Ихьтин гьалари чун терроризмдин тах квай гьерекатрин вилик пад кьун, республикада хатасузвал таъминарун патал лазим тир серенжемар кьабулуниз мажбурзава”, — алава хъувуна С.Меликова.
«Лезги газет»
