Ватандин ЧIехи дяведин йисара агъзурралди аскерар гел галачиз квахьна. Абурун арада Сулейман-Стальский райондин Курхуьрелай тир Агъаев Гьажибалани гьатна.
Ватан къурхулувилик акатай чIавуз советрин халкьарин гзаф векилар хьиз, Гьажибалани гьа сифте варцара фронтдиз фена. Ада Кавказ, Сталинград патал кьиле фейи женгера иштиракна. 1943-йисуз Агъаеврин хизандиз Гьажибала гел галачиз квахьна лагьай кагъаз хтана.
Йисар лап четинбур тир. ГъвечIи балаяр кашакай хуьн патал Гьажибаладин уьмуьрдин юлдаш Бакудиз фена, гьана кIвал-югъ кутуна. Багърийри геждалди аскердин кьисмет чирун патал талукь чкайриз чарарни кхьена, амма хтай жаваб гьа сад тир: “Гьажибала Агъаев гел галачиз квахьна”.
Уьмуьрда тежезвай кIвалахар авайди туш. 2015-йисуз Агъаев Рамазан вичин хуьруьз КIварчагърин дередай яна хъфидайла, адан автомашин рекье авай са яшлу касди акъвазарна. Рамазана ам акьадарна. Фидай рекье итимри сада-садаз чирвал гана. Рамазана вич курхуьруьнви Агъаев Уружбеган хва я лагьайла, кьуьзуь итим тажуб ва шад хьана. Ада дяведин йисара вичи курхуьруьнви Агъаев Гьажибаладихъ галаз са частуна къуллугъайди я лагьана. КилигайтIа, Гьажибала Рамазанан дахдин стха тир кьван.
Ихтилатрай ихтилатар акъатна ва рекьин юлдашди Харьков областдин Михайловка хуьр немсерикай азаддайла Гьажибала телеф хьайиди ва ам вичин гъилералди кучудайди лагьана.
Ихьтин хабарди Рамазан гзаф шадарна. Адан рикI ими кучуднавай чкадиз финин къастунив ацIана. 2016-йисуз Рамазан вичин хвани галаз Михайловкадиз фена. Хуьруьн администрациядин векилри ва агьалийри Дагъустандай атанвай лезгияр гьуьрметдивди къаршиламишна. Абуруз Харьков областдин гел жагъурдай жегьилрин дестеди ва муфтий аварви Рашид Брагина сур жагъуриз куьмекна. Хуьруьн школадин патав телеф хьайи аскерар кучуднавай стхавилин сур гвай. Стхавилин сура 248 аскер кучуднава. Абурукай 8 касдин тIварар малум хьанвай. Гила 9 лагьай касдин, Агъаев Гьажибаладин тIварни дуьздал ахкъатна.
Айдин Балабеков
