Ватандин ЧIехи дяведа Советрин халкьди дуьньядин тарихда гьич садрани тахьай хьтин гъалибвал къазанмишна. Итимрихъ галаз санал къуьн-къуьне аваз дишегьлийрини душмандихъ галаз женгер чIугуна. Абурукай сад лап фадлай инихъ къадим шегьерда яшамиш жезвай ва алатай йисан эхирра 100 йис тамам хьанвай урус дишегьли Евгения Георгиевна Мезенцева я.
Гьелбетда, Ватандин ЧIехи дяведин ва гьунарлу зегьметдин ветерандиз лишанлу юбилей тебрикни тавуна тунач. Адан кьилив мугьманвиле атай “Дербент шегьер” ГО-дин кьил Малик Баглиева Евгения Мезенцевадиз хайи югъ республикадин руководстводин ва шегьердин администрациядин, вири дербентвийрин патай рикIин сидкьидай мубаракна ва рикIел аламукьдай савкьатар гана, гьакIни Россиядин Федерациядин Президент Владимир Путинан тебрикдин Чарни вахкана.
— Чна дяведин вири ветеранрин гьакъиндай датIана къайгъударвал ийизва, гьикI хьи, куьн — Ватан хвейибур — вири халкьдин гьуьрметдиз лайихлу я, — лагьана Малик Баглиева. — Чи мурад куьн инлай кьулухъни гьа ихьтин, уьмуьрдал, яшайишдал ашукьди яз амукьун я.
Къейдна кIанда хьи, гьуьрметлу ветерандиз вичин тарифун ерли адет хьанвай кар туш. И барадай зи рикIелни хъсандиз алама. Шегьердин газетдин редакцияда кIвалахзавай вахтунда Гъалибвилин йикъан вилик макъала кхьин патал зун Евгения Георгиевнадин кьилив фенай, амма гзаф медени кас тир ада разивал ганачир.
…Евгения Георгиевнадин ери-бине Грозный шегьердивай са акьван яргъал тушир Александрийская станица я. 1917-йисан 24-декабрдиз дидедиз хьайи ада чкадин мектебда чирвилер къачуна, ахпа зегьметдин рехъ башламишна. Ватандин ЧIехи дяведин лап сифтедилай гатIунна вичихъ медицинадин рекьяй пешекарвал авай урус руш Дербентдиз атана ва ина 1628-нумрадин эвакогоспиталда дяведин женгера хирер хьайи аскерар сагъар хъийиз хьана.
Кьегьал урус дишегьлидиз Дербентдин медработникрин патай иллаки чIехи гьуьрмет ава. 1947-йисан апрелдилай гатIунна ял ягъунал элячIдалди ада шегьердин центральный больницадин хирургиядин отделенида гьакъисагъвилелди зегьмет чIугуна. Вичин пешедин ва халис инсанвилин тежриба ада цIудралди жегьил духтурриз чирна. Больницадин ветеранрин тешкилатдин активистри, шегьердин УСЗН-дин, агьалийриз комплексный рекьяй къуллугъдай центрдин (КЦСОН) работникри, мектебрин муаллимри ва аялри мукьвал-мукьвал дяведин ва зегьметдин ветерандал кьил чIугвазва, адаз герек тир куьмекар гузва.
Евгения Георгиевна вичин уьмуьрдал, яшайишдин гьар са йикъал кьару я. Ада “Германиядал гъалиб хьунай”, “1941-1945-йисара Ватандин ЧIехи дяведа гьакъисагъ зегьмет чIугунай” ва хейлин маса медалар, гьуьрметдин грамотаяр багьа ядигарар хьиз хуьзва, абурал дамахзава.
Нариман Къарибов
