Дагъустандин чIаларал аялар патал сифте яз махсус канал (IPTV) кардик акатда. И важиблу кардик кьил кутунвайди “Ким” тешкилатдин регьбер, карчи ва программист Эмран Гьуьсейнов я.
Аялриз гъвечIизамаз хайи чIал кIанарунин, чирунин макьсаддалди гъиле кьунвай кар алай аямда иллаки важиблу я. Э.Гьуьсейнова къейд авурвал, гаджетрихъ галаз алакъалу махсус канал арадал гъунив кьве йис идалай вилик эгечIна.
Къейд ийин, “Жигит ТВ” адетдин (аналоговый) телеканал хьтинди туш. Им, анжах телефонрай ва телевизордай махсус приложенидикай менфят къачуналди, дуьньядин гьар са пипIе ачухиз жедай IPTV я.
Приложенидикай менфят къачузвай гьар садаз вичиз кIани чIал хкядай мумкинвал ава. Канал вилик тухунал алахънавай десте алай аямдин мультфильмаяр лезги ва Дагъустандин маса чIалариз таржума авунал, абур къайдадик кутунал машгъул жеда. Мультфильмайрилай гъейри, аялар ва абурун диде-бубаяр патал итижлу передачаяр арадал гъидай фикирни ава. IPTV тамамвилелди 2 вацралай кардик акатда.
Таржумаяр авунин, чIалар (рахунар) кхьинин алакьунар авайбур ва я маса куьмекар гуз кIанзавайбур аватIа, ахьтинбурувай ТВ-дин дестедик экечIиз жеда.
К.Ферзалиев
