Манидардин хуш сесинихъ яб акалайла, шаирдин гуьгьуьл ачухдай шиир кIе­лай­ла, заргардин гуьзел безекриз килигайла, гам хразвай рушан гьейранардай нехишар акурла, инсанри лугьуда: “Аллагьди ганвай пай я”. Аллагьди культура­дин хиле кIвалахдай бажарагъдин пай ган­вайбурукай сад Испикрин хуьруьн клубдин заведующий  Периханум  Къазанбегова  (шикилда)  я лагьайтIа, бажагьат­ зун ягъалмиш жеда.

— Периханум вах неинки бажарагълу культработник, гьакIни ширин сес авай ма-нидар, алакьунар авай гьевескар ар­тист­ни я, — лугьузва райондин культурадин от­делдин начальник, Дагъустандин халкь­дин шаир Майрудин Бабаханова. — Ада районда кьиле тухузвай культурадинни шадвилин вири мярекатра активвилелди иштиракзава. Адан кIвалахдилай чун гзаф рази я.

П. Къазанбеговадин пешекарвал къачунин рехъ масадбурулай са куьналдини тафаватлу туш: ада лап хъсан къиметар аваз школа, гуьгъуьнлай культпросветучилище акьалтIарна. Периханума испиквийриз культурадин рекьяй къуллугъиз 30 йисалай виниз я. РикI алай пешедиз вафалувал къалуруналди, хиве авай везифаяр намуслудаказ тамамаруналди, ада агьалийрин патай лайихлу гьуьрмет къазанмишнава. Ада райондин культурадин дараматда кардик квай фоль­клордин “Куьре” ансамблдин кIва­лахдани активвилелди иштиракзава. Ла­гьана кIанда, адаз лезги халкьдин куьгьне адетар, маниярни­ чида. Хуьре ва районда тухузвай шадвилин мярекатра П.Къа­занбег­о­вади халкьдин куьгьне манияр устаддаказ тамамарзава, гьакIни “Кье-пIи­нин кьилихъ дидедин лайлаяр”, “Яран суварин лирли”, “Гуни”, “Пешапай”, “Гатфарин лирли” ва гъвечIи маса сегьнеяр къалурзава.

— Зи репертуарда лезги халкьдин адетар къалурзавай, шииррин жуьреда туь­кIуьрнавай хурун эсерри кьетIен чка кьазва, — лугьузва Периханум Къазанбеговади. — Абурай чаз чи бубайрин руьгьдин гьа­къикъат, адан эбедивал аквазва. Мадни, абурухъ несилдиз тербия гунин жигьетдайни чIехи метлеб ава. И кардиз чна кье­тIен фикир гана кIанда. Халкьди вичин ивирар квадарайтIа, чун кесиб жеда, са кьадар вахт алатайла, чаз чун виляй аватда. Гьавиляй чна вирида чи руьгьдин девлетдин къайгъу датIана чIу­гуна кIанда.

Испикрин хуьруьн культурадинни ял ягъунин центрадин (КДЦ-дин) заведующийвилин везифаярни П. Къазанбеговади намуслудаказ кьиле тухузва. Хуьре су­в­аррин, лишанлу йикъарин шадвилин мя­рекатрин тешкилатчини ам вич я.

Адахъ дурумлу зегьметдай ганвай дипломар, грамотаяр са шумуд ава. Алай йисуз, Россиядин культурадин работникрин йикъан сергьятра аваз, адав муниципальный райондин кьил Нариман Абдулмуталибова чухсагъулдин чар вахкана.

Чна винидихъ къейд авурвал, 30 йи­са­лай виниз вичин рикI алай пешедай кIва­лахзавай Периханум Къазанбего­вадикай макъала кхьидайла, зи рикIел туь­р­керин шаир Надым Хикмета лагьай келимаяр хтана: “Ашкъидивди кIвалахал физвай ва шадвилелди кIвализ хквезвай инсан бахтлу кас я”. Са рахунни алачиз, и гафар П.Къазанбеговадизни талукьариз жеда.

Хазран  Кьасумов