КIелзавайбурув алай йисан “Самур” журналдин цIийи нумраяр агакьнава. Сад лагьай нумра саки Дагъустандин халкьдин шаир Арбен Къардашан уьмуьрдиз ва яратмишунриз бахшнава. Пудкъад йисан юбилей къейднавай писателдикай, драматургдикай, таржумачидикай, литературоведдикай кьилин макъала Азиз Мирзабегова кхьенва.
Милли, Дагъустандин ва Россиядин литература вилик тухуник аквадай хьтин пай кутазвай илгьамдардин, пешекардин устадвиликай, кьетIенвилерикай, бажарагъдикай, руьгьдин гьарай-эвердикай Пакизат Фатуллаевади, Жамиля Гьасановади, Мердали Жалилова, Халидин Эльдарова кхьизва. Лезги эдебиятдин невевилин везифа вичин хивез къачунвай шаирди Дагъустандин шииратда ва гьикаятда еке жавабдарвилелди, хцивилелди яратмишзава. Идан гьакъиндай эхиримжи йисара чапдай акъатнавай гьам гъвечIи ва гьам чIехи эсерри, ктабри шагьидвалзава.
Журналди кIелзавайбуруз писателдин цIийи эсеррихъ, гьа гьисабдай яз “ВачIе — хваяр” романдихъ галазни таниш жедай мумкинвал гузва.
Нумрада гьакI РФ-дин искусствойрин лайихлу деятель, РД-дин Государственный премиядин лауреат, бажарагълу композитор Мегьамед Гьуьсейнован 80 йисан юбилейдихъ галаз алакъалу яз Абдуселим Исмаилован “Къизмиш везинрал алаз фейи уьмуьр” макъала, “Муштулухар” ганва.
“Самур” журналдин 2-нумра писателрин, шаиррин юбилейрихъ галаз алакъалу макъалайралди, рикIел хкунралди, веревирдералди, рецензийралди ва авторрин эсерралди девлетлу я.
Дагъустандин халкьдин писатель Къияс Межидов дидедиз хьайидалай инихъ 110 ва рагьметдиз фейидалай инихъ 47 йис тамам хьанва. Адан уьмуьрдиз ва яратмишунриз литературовед Гьажи Гашарован “Халкьдин рикI алаз уьмуьр тухвайди” макъала талукьарнава. Писателдин “Дагълар юзазва” повестдай чIукни ганва.
Алай аямдин бажарагълу шаир, литературовед ва алим Фейзудин Нагъиеван 70 йис тамам хьун адан цIийи шиирар чап авуналди къейднава.
“Милли шииратдин рагъ” рубрикадик кваз Мансур Куьревиди урус чIалал акъуднавай “Етим Эмин (1840-1880)” ктабдикай ва яратмишунрикай “Вил алай савкьат”, “Етим Эминан шиир “гуьнгуьна” хтунин са чешне” ва “РикI алай шаирдикай цIийи ктаб” макъалаяр ганва.
Журналдин кьилин макъалада Дагъустандин халкьдин писатель Абдуселим Исмаилова и алай заманада инсанвал гьикI хуьдатIа, гьадакай веревирдер ийизва. Нумрада Арбен Къардашан “ВачIе — хваяр” роман гун давамарзава.
“Стха халкьарин шаирар” рубрикадик кваз лакви шаир Нурадин Юсупован 90 йисахъ галаз алакъалу яз адан шиирар теклифнава.
КIелзавайбуруз Бренбег Абдуллаеван шииррихъ, “Сатира ва юмор” разделда ганвай мезелийрихъ, къаравилийрихъ галаз таниш жедай мумкинвални ава.
Абад Азадов
